Taldyqorǵanda 200-den astam páterge qatysty qujattar sotta qaralyp jatyr

TALDYQORǴAN. QazAqparat - Taldyqorǵanda 200-den astam páterge qatysty qujattar sotta qaralýda, dep habarlaıdy QazAqparat tilshisi.

Bul jóninde oblys prokýrory Madııar Basshybaev málim etti.

«Oblys ortalyǵy Taldyqorǵanda turǵyn úıge qatysty máseleler halyq arasynda kóp ýaqyttan beri narazylyq týdyryp keldi. Onyń birinshisi – buryn myńnan astam páter zańsyz berilip, turǵyndar qujattaryn zańdastyra almaǵan.

Qala ákimdigimen jáne basqa da múddeli organdarmen birlese osy baǵytta birshama jumystar atqaryldy. Búgingi kúnge, 750 páter zańdastyryldy (541 – páter ıesine rásimdeldi, 213-y – memlekettik organdar balansyna ótkizildi). 200-den astam páterge qatysty qujattar sotta qaralýda»,- dedi ol.

Páterlerdi zańsyz úlestirý boıynsha qazir tergeý amaldary júrgizilýde.

Ákimdiktiń burynǵy laýazymdy tulǵasy men ortadaǵy deldal «úı qamaǵynda» ustalýda.

Ekinshisi, kezekke qatysty.

Kezinde páterge kezek júıesi buzylyp, 1 700 adam odan tys qaldy.

«Sebebi byltyr qala halqymen kesdesýde jáne basqa da jıyndarda oblys prokýrory birneshe márte aıtyp ótti (2019-2020 jyldary kezekti elektrondyq formatqa aýystyrý barysynda oryn alǵan olqylyqtar). Bul jumys ta qolǵa alyndy. Osy kúnge deıin 1 400 adam kezekke qaıta qoıyldy.

Qalǵandary boıynsha jumys jalǵasýda.

Úshinshisi, áleýmettik osal topqa arnalyp salynǵan «Kottedj qalashyǵynyń» qurylys sapasyna qatysty. Másele turǵyndar arasynda kóp narazylyq týdyrdy«,- dedi Madııar Basshybaev.

Onyń sózinshe, 230 úıdiń sapasyn prokýratýra tekserip, jarty mıllıard teńgeden astam somaǵa oryndalmaǵan qurylys jumystaryn anyqtady.

Qylmystyq is qozǵalyp, qazir arnaıy prokýrorlarmen tergelýde.

Tergeý aıasynda, birneshe adamdar ustalyp, qamaýǵa alyndy. Olar - ákimdiktiń 3 laýazymdy tulǵasy men tehnıkalyq qadaǵalaýdy júzege asyrýshy 2 maman.