Taldyqorǵanda 200-den astam káriz qudyǵynyń shoıyn qaqpaǵy urlanǵan

TALDYQORǴAN. QazAqparat - Taldyqorǵanda sý jáne káriz júıeleri qudyqtarynyń, aryq betindegi temir qaqpaǵyn urlaý azaımaı tur. Jyl basynan beri 200den astam shoıyn qaqpaq qoldy boldy, dep habarlaıdy QazAqparat tilshisi.

Qala ákimdigi urlanǵan 200-den astam qaqpaqtyń tek 150-in qaıta japty. Áli de 50 qudyq pen aryqtyń beti ashyq jatyr. Jergilikti polıtsııa qyzmetiniń málimetinshe jyl basynan beri qaqpaq urlyǵy boıynsha nebári bes qylmystyq is qozǵalyp, onyń tórteýi ashylǵan. Al byltyr 16 oqıǵa tirkelip, 13 is ashylmaı qalǵan. Kóp jaǵdaıda polıtseıler temir synyǵyn qabyldaýshylardy teksere almaıdy. Sebebi olar jeke kásipker retinde tirkelgen. Al elimizde orta jáne shaǵyn bıznes ókilderin sebepsiz tekserýge moratorıı jarııalanǵan.

19 qarashadan bastap Taldyqorǵanda «Temir qaqpaq urlyǵyna jol joq» atty arnaıy shara ótkizilýde.

«Urylar kóbine qaladaǵy temir-tersek qabyldaýshylarǵa emes, kórshi aýdandarda aparyp ótkizedi. Onyń ózinde bólshektep, syndyryp ótkizedi», - deıdi qalalyq turǵyn úı-kommýnaldyq sharýashylyǵy bólimi basshysynyń mindetin atqarýshy Nurlan Shaıahmetov.

Onyń aıtýynsha qazir temir qaqpaqtyń quny 10-20 myń teńge aralyǵynda. Al urylar ony salmaǵyna qaraı nebári 3-4 myń teńgege ótkizedi.