Taldyqorǵanda 20 jastaǵy jigitti kóshede atyp ketti
TALDYQORǴAN.QazAqparat - Taldyqorǵanda jantúrshigerlik oqıǵa boldy. 30 jeltoqsan kúni keshki saǵat jetiler shamasynda jas jigitti belgisiz bireý kóshede atyp ketti, dep habarlaıdy QazAqparat tilshisi.
Oblystyq ІІD baspasóz qyzmetiniń ókili Kóbeıhan Nurahmetov bul oqıǵany rastady. Qazir kúdikti retinde 1998 jylǵy bozbala ustaldy.
Anyqtalǵandaı, ol qaladaǵy kolledjderdiń birinde oqıdy. Eki jas jigit bastapqyda sózge kelispeı eregesip qalǵan. Sońynda 19 jastaǵy stýdent tanysyn sholaq myltyqpen atyp jibergen. Jábirlenýshi oqıǵa ornynda kóz jumdy. Qazir osy oqıǵaǵa baılanysty QR QK 99-babynyń ekinshi tarmaǵyna sáıkes is qozǵalyp, tergeý jalǵasýda.
Kúdikti qamaýǵa alyndy. Al sholaq myltyq is materıalyna aıǵaq zat retinde tirkeldi.
