Taldyqorǵanda 20 otbasy qonys toıyn toılap jatyr

TALDYQORǴAN. QazAqparat - Búgin Taldyqorǵanda 20 otbasy baspanaly boldy. «Juldyz» shaǵynaýdanynda boı kótergen 20 páterli kommýnaldyq úıdiń kiltin qala ákimi Ǵalymjan Ábdiraıymov tabys etti, dep habarlaıdy QazAqparat tilshisi.

2 jáne 3 bólmeli páterge múmkindigi shekteýli jandar, zeınetkerler, bıýdjettik qyzmetkerler, jalǵyzbasty analar men kópbalaly otbasylar ıe boldy.

«Úıimiz keń, jaryq. Oǵan qosa mektepke de jaqyn. Balalardyń sabaǵyna yńǵaıly boldy. Búgingi kúndi biz zaryǵa kúttik. Qazir endi qýanyshymyzda shek joq. Ákimdik qyzmetkerlerine rahmetimizdi aıtamyn», - deıdi kezekpen páter alǵan Olga Genadevna.

Aıta ketý kerek, jańadan boı kótergen baspananyń qurylysy «Nurly jer» baǵdarlamasy boıynsha 2018 bastalyp, bir jyldyń ishinde aıaqtaldy.