Taldyqorǵanda 18 urlyqqa qatysy bar degen kúdikpen 21 jastaǵy turǵyn ustaldy
TALDYQORǴAN.QazAqparat - Taldyqorǵanda polıtseıler jeke úılerden ózgeniń múlkin urlaýdy kásip qylǵan kúdiktini qolǵa túsirdi,- dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 2019 jylǵy qazan aıynan bastap oblys ortalyǵy men jaqyn ornalasqan eldi mekenderde jeke sektordaǵy birqatar urlyq deregi tirkelgen. Qylmys jasaý tásili men oqıǵa ornynan ortaq belgilerdiń bar ekeni anyqtalyp, bir adam jasaýy múmkin degen boljam qarastyryldy.
Jedel-izdestirý is-sharalaryn júrgizgen qalalyq polıtsııanyń Batys bólimshesiniń jedel ýákilderi 21 jastaǵy jergilikti turǵyndy urlyqtyń 18 deregine qatysy bar degen kúdikpen ustady. Tirkelgen barlyq urlyq derekteri úı ıeleri bolmaǵan kezde, ıaǵnı kúndizgi ýaqytta plastıkalyq terezelerdi buzý ádisimen jasalǵan. Kúdikti zergerlik buıymdardy, aqsha, teledıdarlar, noýtbýkter, telefondar, saǵattar jáne basqa da baǵaly múlikterdi urlaǵan. Qazirgi tańda jábirlenýshilerge keltirilgen materıaldyq shyǵyn mólsheri 3 mıllıon 700 myń teńgeni quraıdy.
«Kúdikti ýaqytsha ustaý ızolıatoryna qamaýǵa alyndy. Qazirgi ýaqytta QR Qylmystyq kodeksiniń 188-babyna sáıkes, sotqa deıingi tergeý amaldary júrgizilýde. Sonymen qatar ustalǵan azamattyń osyǵan uqsas ózge de qylmystarǵa qatystylyǵy tekseriledi»,- dep málimdedi Almaty oblysy PD baspasóz qyzmeti.
