Taldyqorǵanda 168 otbasy baspanaly boldy

TALDYQORǴAN. QazAqparat - Taldyqorǵan qalasynda «Nurly jol» baǵdarlamasy aıasynda 168 páterli turǵyn úı kesheni paıdalanýǵa berildi. Shańyraqty bolǵandardyń basym bóligi Turǵyn úı qurylys jınaq bankiniń salymshylary. Sondaı-aq baspana kezeginde turǵan azamattar da qonys toıyn toılady, dep habarlaıdy QazAqparat tilshisi.

Úı kiltterin tapsyrý saltanatyna qatysqan oblys ákimi Amandyq Batalov turǵyndardy qonys toıymen quttyqtap, shańyraqtaryna shattyq tiledi.

Jeke baspanasynyń kiltin alǵan qala turǵyndary jalpy memleket úı alýǵa bárine birdeı qolaıly jaǵdaı týǵyzyp otyrǵanyn atap ótti. Baspana ákimdikte kezekte turǵandarǵa da, bank salymshylaryna da 1 sharshy metri úshin 140 000 teńgeden berildi.

 

«Almaty oblysynda bizdiń 43 myń salymshymyz bar. Bul óte úlken kórsetkish. Ózge óńirlermen salystyrǵanda Almaty oblysynyń eldi mekenderinde ınfraqurylym jaqsy damyǵan. Úı salynatyn jerlerge barlyq júıeler jetkizilgen. Bul úshin ákimdikke úlken alǵys aıtamyz. Bolashaqta biz Jetisý jerinde halyqty baspanamen qamtýdy kózdeıtin jarqyn jobalardy júzege asyramyz» dep atap ótti «Qazaqstannyń turǵyn úı qurylys jınaq banki» AQ Basqarma tóraǵasy Lázzat Ibragımova.

Aıta ketelik, kiltterdi tapsyrý saltanatyna deıin Almaty oblysy ákimdigi men «Turǵyn úı qurylys jınaq banki» AQ óńirde turǵyn úı qurylysyn damytý jónindegi memorandýmǵa qol qoıdy.  

 

Sondaı-aq, banktiń Basqarma tóraıymynyń orynbasary Janar Jýbanııazova Taldyqorǵanda «Nurly jol», «Nurly jer», «Óz úıim», «Korporatıvti turǵyn úı» baǵdarlamalary boıynsha salynyp jatqan qurylystarmen tanysqan bolatyn.

Jyl sońyna deıin Almaty oblysynda taǵy 672 otbasy baspanaly bolady. Aımaqta 6 úı paıdalanýǵa beriledi dep josparlanýda, onyń tórteýi Taldyqorǵanda, qalǵan ekeýi Qaskeleń men Іle aýdanyndaǵy Ótegen batyr kentinde ornalasqan.