Taldyqorǵanda 16-qabattan sekirmek bolǵan turǵyn qutqaryldy
TALDYQORǴAN.QazAqparat - Taldyqorǵanda tártip saqshylarynyń jyldam áreketi men júıeli jumysynyń nátıjesinde ózine-ózi qol salmaqshy bolǵan 24 jastaǵy qala turǵyny qutqaryldy, dep habarlaıdy QazAqparat tilshisi.
Qańtardyń 6-na qaraǵan túni oblys ortalyǵynyń Polıtsııa basqarmasyna qalada salynyp jatqan 16 qabattyq qurylystan er adam sekirmekshi bolyp turǵany týraly habar túsken. «Qaratal» shaǵyn aýdanyna shuǵyl jetken tártip saqshylary 24 jastaǵy azamattyń kim ekenin anyqtap, qaıǵyly jaǵdaıdyń aldyn aldy.
«Oqıǵa ornyna jetken tártip saqshylary 24 jastaǵy turǵynnyń otbasylyq jaǵdaıyna qatysty talaptaryn tyńdady. Sol jerge jigittiń jaqyndary shaqyrylyp, onyń qaýipsiz jerge ótýi qamtamasyz etildi. Saraptama nátıjesi boıynsha onyń masań kúıde ekeni anyqtaldy»,- dep atap ótti oblystyq PD baspasóz qyzmeti.
Aldyn ala tergeý boıynsha azamattyń otbasylyq túsinbestikten keıin qurylystyń eń bıik tusyna shyqqany belgili boldy. Qalalyq polıtseıler azamatty túsindirý jáne aldyn alý jumystaryn júrgizip, úıine jiberdi.
