Taldyqorǵanda 135 adam turatyn birneshe úı karantınge jabyldy
TALDYQORǴAN. QazAqparat - Almaty oblysynda koronavırýs ınfektsııasynyń taǵy 3 jaǵdaıy tirkeldi, olar – Taldyqorǵan qalasynyń turǵyndary, dep habarlaıdy QazAqparat tilshisi.
Almaty oblysy ákimdigi baspasóz qyzmetiniń málimetinshe, 1991, 1997, 1972 jyly týǵan 3 patsıenttiń de syrqaty PTR-taldaýy kezinde anyqtalǵan. Aldymen oblystyq aýrýhananyń provızorlyq bólimine jetkizilgen patsıentter qazir Taldyqorǵandaǵy áskerı gospıtalǵa aýystyryldy.
Olarmen 15 adamnyń qarym-qatynasta bolǵany anyqtaldy. Olar medıtsınalyq baqylaýǵa alynyp, epıdemıologııalyq zertteý júrgizilýde.
Sol sııaqty Taldyqorǵan qalalyq memlekettik bas sanıtar dárigeriniń 18 mamyrdaǵy №4 qaýlysymen oblys ortalyǵyndaǵy Samal shaǵynaýdanyndaǵy 1-úıge, Aqjazyq kóshesindegi 5-úıge, Jandosov kóshesindegi 5-úıge 14 kúndik karantın engizildi. Bul úılerde 135 adam turady.
Jalpy Almaty oblysynda koronavırýs juqtyrǵandar sany - 209, sonyń ishinde Taldyqorǵan qalasynda 10 adam bar.
