Taldyqorǵanda 13 adamǵa páter alyp beremin degender sottaldy

TALDYQORǴAN. QazAqparat - Taldyqorǵanda 13 adamǵa ońaı jolmen páter alýǵa ýáde berip, jábirlenýshilerdiń 18 mln teńgesin ıemdengen 2 adam sottaldy, -dep habarlaıdy QazAqparat tilshisi.

«Taldyqorǵan qalasynyń 2 azamaty QR QK-niń 190 babynyń 3 bóligi 3,4 tarmaqtarymen kináli dep tanyldy. Ár qaısysyna 4 jyl merimnen bas bostandyǵynan aıyrý jazasy taǵaıyndaldy.

Atalǵan sottalýshylar qala turǵyndaryna ońaı jolmen páter alyp beremiz dep senimderine kirip, olardyń qarajattaryn ıemdengen»,- delingen Taldyqorǵan qalasy prokýratýrasynyń habarlamasynda.

Vedomstvonyń aqparatyna sáıkes, jalpy is boıynsha 13 jábirlenýshige 18 000 000 teńge shamasynda materıaldyq zalal keltirilgen.

«Sońǵy ýaqyttarda memlekettik baǵdarlamalar arqyly páter alýǵa yqpal etemin degen jalǵan jeleýmen adamdardan aldap aqsha alý derekteri kóp kezdesýde.
Sonymen qatar jalǵan qujattardy nemese adamnyń senimin paıdalaný arqyly nesıe alý alaıaqtyǵy da jıi kezdesedi.
Qylmystyq kodekstiń 190-babyna sáıkes alaıaqtyq - bótenniń múlkin jymqyrý nemese aldaý, senimdi teris paıdalaný jolymen bóten múlikke quqyqty ıemdený bolyp tabylady. Atalǵan baptyń sanktsııasynda 10 jylǵa deıin bas bostandyǵynan aıyrý jazasy qarastyrylǵan.
Aǵymdaǵy jyldyń ótken kezeńinde byltyrǵy jyldyń jarty jyldyǵyna qaraǵanda Taldyqorǵan qalalyq sotymen alaıaqtyq deregi boıynsha isterdi qaraý 50 paıyzǵa ósken»,- dep tolyqtyrdy prokýratýranyń baspasóz qyzmetinen.
Taldyqorǵan qalalyq prokýratýrasy qala turǵyndaryn turmystyq, qyzmettik, kásipkerlik jáne basqa da kúndelikti azamattyq qatynastarda óte saq jáne muqııat bolýǵa, eshkimge óziniń jeke basyna qatysty málimetterdi taratpaýǵa, alaıaqtyqqa jol bermeýge shaqyrady.