Taldyqorǵanda 11 mln teńgeniń aıaldamasy jarty jyldan beri istemeı tur
TALDYQORǴAN. QazAqparat - Taldyqorǵannyń kireberisinde ornatylǵan «Smart» aıaldama jarty jyldan beri istemeı tur. Al bul aıaldamanyń quny 11 mıllıon teńgege baǵalanǵan, dep habarlaıdy QazAqparat tilshisi.
«Jalaıyrı dańǵylynyń boıyndaǵy smart aıaldama alǵashqy kezde merdiger tarapynan úlgi retinde qoıylǵan bolatyn. Qazir sapasy men baǵasy qala ákimdigine saı kelmegendikten jabyq tur. Aıaldamanyń taǵdyry qalaı bolatyny belgisiz. Bul aıaldamanyń quny 11 mln teńge. Qazir merdiger kompanııa ókilderimen kelissózder júrgizilip jatyr», - dedi Taldyqorǵan qalasy ákiminiń baspasóz hatshysy Danııar Janys.
Al qazir qala ákimdigi 11 mln teńgeniń emes 8 mln teńgeniń aıaldamalaryn Taldyqorǵannyń 6-y jerine ornatty. Aldaǵy ýaqytta taǵy 4-eýi qoıylady. Biraq turǵyndar 8 mln teńgeniń aıaldamasy tym qymbat dep narazy.
«Baǵasy óte qymbat. Sol segiz mıllıon teńgege eki bólmeli páter alyp, muqtaj jandarǵa berse, durys bolatyn edi», - deıdi taldyqorǵandyq Temirgúl Muratbekova.
Qalalyq ákimdik 2017-2018 jyldary evrostandartqa saı 50 aıaldama ornatylǵanyn jetkizdi. Bıyl taǵy 46-sy qoıylady dep josparlanýda. Al qarapaıym aıaldamadan asa aıyrmashylyǵy joq bul avtobýs kútetin orynnyń bireýiniń quny 2 mln 800 myń teńgege baǵalanǵan.
