Taldyqorǵanda 100-ge jýyq avtobýs júrgizýshisi 4 aıdan beri jalaqysyn almaǵan
TALDYQORǴAN.QazAqparat - Taldyqorǵanda 4 aıdan beri jalaqysyn almaǵan avtobýs júrgizýshileri jumysqa shyqpaı qoıdy. Saldarynan qalada birneshe baǵyt boıynsha qoǵamdyq kólik júrmeı, turǵyndar jaıaý qaldy, dep habarlaıdy QazAqparat tilshisi.
«Kúnde erteń, kúnde erteńmen jigitterdiń bári sharshady. Kóbi páter jaldap turady. Kredıt bar. Ipoteka degen áńgime. Bular kúnde erteńmen eldiń bárin sharshatyp bitirdi. Búgin shyqpaǵan sebebimiz sol. Sonymen aqsha bergenshe shyqpaımyz, turamyz», - dedi avtobýs júrgizýshisi Nurdáýlet Túndebaev.
Avtopark basshylyǵy jolaýshylar tasymaly shyǵyny kóp sala degendi alǵa tartyp, jalaqynyń kesheýildeýine pandemııa sebep bolǵanyn aıtady. Qala bıýdjetine alaqan jaıǵan kásiporyn karantınde oqýshy tasymaldaýǵa bólinetin sýbsıdııadan qaǵylǵan kórinedi.
«Jolaýshylar tasymalynyń shyǵyny kóp. Shyǵyn kóp bolǵannan keıin ákimdikke tólemimizdi beremiz. Sol tólemge qarap sýbsıdııa jasaıdy. Sýbsıdııa jasaǵannan keıin aılyq bere alamyz, salyq tóleı alamyz, qural-saıman ala alamyz. Bárin jasaı alamyz», -dedi seriktestik dırektory Bolat Tileýbaev.
Atqarýshy bılik bul seriktestik aldynda bereshegimiz joq deıdi. Tipti kópbalaly analar tasymalyna bólinetin qarjynyń eki toqsandyq kólemin tólep qoıǵan. Al júrgizýshilerge jalaqy berilmeýiniń naqty sebepterin quzyrly organdar tekserip, anyqtaıtyn bolady.
