Taldyqorǵanda 10 jyldan beri úı kezeginde turǵan 5 myńnan astam adam tizimnen shyǵyp qaldy
TALDYQORǴAN.QazAqparat - Taldyqorǵanda 10 jyldan beri úı kezeginde turǵan 5 myńnan astam adam tizimnen shyǵyp qaldy. Al keı turǵyndardyń kezekteri keri jyljyp jatyr, dep habarlaıdy QazAqparat tilshisi.
Máselen, Baqyt Jamalova múgedek balasyn asyrap otyrǵanyn aıtady. Ol 12 jyl buryn úı kezegine turǵan. Jylda-jylda kezekteri el qatarly jyljyp jatqan. Biraq aıaqasty kezekten múldem alyp tastapty. Sharasyz qalǵan ana múgedek balam jazylyp ketken joq, quqyǵymdy taptap jatyr dep kúıinip tur.
«Men úı kezeginde 315 bolyp turǵanmyn. Qazir 150-shi bolý kerekpin. Syzyp tastaǵan. Sebebin eshkim túsindirmeıdi. Men talap etemin, kezegimdi qalpyna keltirsin», - deıdi ol.
Al taǵy bir turǵyn kezeginiń keri jyljyp ketkenine ashýly.
«Kelip teksertsem, meni 5560-qa laqtyryp tastapty. Keri jyljytqan. Men aptasyna úsh ret dıalezge baramyn. Janymdaǵy adamdar shetinen kóz jumyp jatyr. Densaýlyǵyma baılanysty men bes myń bálenbaıynshy kezekti kúte almaımyn, ólip qalamyn. Talabym kelekti qalpyna keltirsin», - dedi birinshi toptaǵy múgedek Raýshan Tursynova.
Al halyqty shýlatyp jatqan turǵyn úı kommýnaldyq sharýashylyq bólimdegiler 5 myńnan astam adam úı kezeginen syzylyp tastaldy dedi. Sebepteri ártúrli. Biriniń basynda úıi bar, biriniń mekenjaıy aýysqan. Al kezekteri aldyǵa emes, kerisinshe artqa jyljyp ketkender zańsyz úı kezeginde turǵandar dep óz kánilaryn moıyndap qoıdy.
«Osy kategorııalar zańsyz bolyp kelgen. Bul jerde turǵyndardy kánilap turǵan joqpyz. Bul kisilerge de durys aqparattandyrý júrgizip jatyrmyz. Bul kezekterdiń barlyǵy 2004 jyldan bastap júrip kelgen. Barlyǵyna osy azamattarǵa qoldaryna spravka berilip kelgen. Siz 20-shy tursyz dep, siz 1000 tursyz dep», - dedi Taldyqorǵan qalalyq TÚKSh bóliminiń sektor meńgerýshisi Danııar Orazov.
Danııar Orazovtyń sózinshe, buǵan deıin turǵyndardy 19 sanat boıynsha úı kezegine qoıyp kelgen. Endi elektorndy bazaǵa engizý úshin sanattar biriktilip, 6 sanat ǵana qalǵan. Sol sebepti turǵyndardyń kezegi aldyǵa emes, kersinshe artqa jyljyp ketken.
Al, biri kezekten múldem syzylyp, biriniń kezegi artqa jyljyp jatqan turǵyndar barlyq bylyqqa ákimdiktegilerdiń ózderi kánáli deıdi. Zańdy túrde kezekke turdyq, endi barlyǵyn qalpyna keltirsin, oılaryna kelgendi isteýge jol bermeımiz dep ashýly. Shyryldap qalǵan jandar úı kezegine durys qoımaǵan ákimdiktegiler jaýapqa tartylsyn dep talap qoıýda.
