Taldyqorǵanda 1,5 mln teńge zeınetaqyny jetkizbek bolǵan poshta qyzmetkerin tonap ketti
TALDYQORǴAN. QazAqparat – Taldyqorǵanda poshta qyzmetkerin tonap ketti. Onyń qolynda zeınetkerlerge tıesili 1,5 mln teńge aqsha bolǵan, dep habarlaıdy QazAqparat tilshisi.
Oqıǵa 3 aqpan kúni boldy. Kúndizdi saǵat 11:00-de polıtsııa bólimshesine 53 jastaǵy poshta qyzmetkeri aryzdanǵan.
«Poshta qyzmetkeri velosıpedpen zeınetkerler úıine kele jatqan tusta belgisiz bireý artqy jaqtan kelip, artqy jáshiginde jatqan dorbany alyp ketken. Al onda 1,5 mln teńge qarajat bolǵan. Jedel-izdestirý sharasy barysynda 40 jastaǵy jumyssyz júrgen jergilikti turǵyn ustaldy. Ol óz kinásin moıyndady. Kúdikti buǵan deıin de sottalǵan bolyp shyqty», - dedi Taldyqorǵan qalalyq Polıtsııa basqarmasynyń basshysy Asqar Nursapa.
Almaty oblystyq Polıtsııa departamenti baspasóz qyzmetiniń málimetinshe, qazir atalǵan faktige sáıkes QR QK 191 baby 1 bóligi «Tonaý» deregi boıynsha sot aldy tergeý júrip jatyr. Kúdikti ýaqytsha ustaý ızolıatoryna qamaldy.
