Taldyqorǵan jastary týǵan qalasyn nasıhattaıtyn mıýzıkl túsirdi
TALDYQORǴAN. QazAqparat - Taldyqorǵandyq jastar qalany nasıhattaýdyń jańa jolyn tapty. Olar «I love Taldykorgan» mıýzıklin túsirip, atalmysh fılmniń alǵashqy kórsetilimi Taldyqorǵandaǵy «Atameken» kınoteatrynda ótti. Túsirilimniń shyǵarmashylyq tobyn oblys ákimi Amandyq Batalov quttyqtap, týyndyny kórermendermen birge tamashalady, dep habarlaıdy QazAqparat tilshisi óńir ákimdiginiń baspasóz qyzmetine silteme jasap.
«I love Taldykorgan» mıýzıkli - týǵan jerge, týǵan elge, týǵan qalaǵa degen súıispenshilikti nasıhattaıtyn, otbasylyq qundylyqtar men baýyrlastyq ıdeıalaryn alǵa shyǵarǵan 50 mınýttyq fılm. Basty keıipkerlerdiń ómir tarıhyn án men bımen asha otyryp, tabıǵattyń ásemdigimen, qalanyń kórikti ajarymen tamasha úılesimde bere bilgen. Fılmde oblys ortalyǵynyń basty kórnekti oryndary men jańa nysandary, sonyń ishinde áýejaı, Qaratal ózeniniń jaǵalaýy, «Jastar» saıabaǵy, Oqýshylar saraıy jáne basqa da nysandar kóz tartady.
Fılm rejısseri - Erlan Oshaqbaev, stsenarıı avtory - Medet Qurmanov pen Ádilbek Ábilov. Basty rólderdi Erik Hamı men Karına Jumalıeva somdady. Sol sııaqty mıýzıklda Beksultan Qazybek pen Aıan Tólepbergen de oınaǵan.Fılm aıaqtalǵanda kórermender dýyldata qol soǵyp, ózderiniń ystyq yqylasyn bildirdi.
Jastardyń mańyzdy jobasyna qoldaý bildirgeni úshin jastardyń atynan fılmniń rejısseri Erlan Oshaqpaev oblys basshylyǵyna alǵysyn jetkizdi.
«Mıýzıkl kóńildi ári shynaıy fılm bolyp shyqqan eken. Taldyqorǵan - óte ádemi qala, jýyrda jýrnalısterge bergen suhbatynda Elbasy Taldyqorǵan týraly jaqsy pikir bildirdi. Biz sol baǵaǵa qýanyp qana qoımaı, soǵan laıyq budan ári de jumys jasaýǵa tıispiz. Búgingi fılmde tek qalany ǵana emes, onyń eń basty baılyǵy - onyń meıirimdi de daryndy turǵyndaryn da kórsete bildińder. Kreatıvti oılaryń úshin kóp rahmet aıtamyn. Biz óz tarapymyzdan jastardyń bastamalaryn qashanda qoldaımyz. Osy jyldy Prezıdent Jastar jyly dep jarııalady. Bul jyl óz múmkindikterińdi barynsha ashýǵa múmkindik beretin erekshe jyl bolmaq. Senderge shyǵarmashylyq tabys, shalqar shabyt tileımin», - dedi Almaty oblysynyń ákimi Amandyq Batalov.
Atap ótsek, bul - Jetisý jastarynyń oblystyq ishki saıasat basqarmasymen birigip túsirgen úshinshi fılmi. Mıýzıkl Taldyqorǵan qalasy men onyń mańynda 15 kún ishinde túsirilgen.
