Taldyqorǵan-Úsharal avtojoly bıyl paıdalanýǵa beriledi – «QazAvtojol»
TALDYQORǴAN.QazAqparat - Bıylǵy jyl sońyna deıin Taldyqorǵan-Úsharal avtojoly paıdalanýǵa beriledi dep josparlanýda. Qazir 313 shaqyrym joldyń jartysynan kóbi aıaqtaldy, dep habarlaıdy QazAqparat tilshisi.
«Almaty-Óskemen jobasynyń 313 shaqyrymy bizdiń Almaty oblysy arqyly ótedi. Ol 5 ýchaskege bólingen. Qazir barlyq ýchaskede jumys qarqyndy júrip jatyr. 1500 adam, 800-ge jýyq tehnıka jumyldyrylǵan. Bıylǵa josparymyz - jyl sońyna deıin 5 ýchaskeni tolyq bitirip, halyqqa paıdalanýǵa berý», - dedi «QazAvtoJol» UQ» AQ Almaty oblystyq fılıaly dırektorynyń mindetin atqarýshy Mereı Shaharbaev.
M. Shaharbaevtiń sózinshe, Taldyqorǵan-Úsharal trassasynyń uzyndyǵy 313 shaqyrym bolsa, qazir onyń 180 shaqyrymy eki jolaqpen salynyp, paıdalanýǵa berilgen. Bul jańa jolmen kólikter júrip jatyr. Alaıda, júrgizýshiler paıdalanýǵa berilip jatqan joldardyń uzyndyǵy óte qysqa bolǵandyqtan, qaıta-qaıta qara jolǵa túsip, álekke túsetinin aıtýda.
Jalpy joba boıynsha Taldyqorǵan-Úsharal joly 2022 jyldyń kúzinde aıaqtalýǵa tıis. Josparǵa sáıkes 23 kópir salynady. Joldy Qytaıdyń «CITIC Contraction» kompanııasy jasap jatyr, merdigerler aýyspaǵan.
Aıta keteıik, «QazAvtoJol» ókilderi atalmysh trassany byltyrǵy jyldyń sońyna deıin aıaqtaýǵa ýáde bergen edi. Biraq bul jospar pandemııanyń kesirinen júzege aspaı qalǵan.
