«Taldyqorǵan-Úsharal-Alakól» joly qashan ashylady

NUR-SULTAN. QazAqparat - Bıyl «Taldyqorǵan-Úsharal-Alakól» jolynda kólik qatynaı bastaıdy. Bul jaıynda QR Indýstrııa jáne ınfraqurylymdyq damý mınıstrliginiń Telegram paraqshasynda jarııalandy, dep habarlaıdy QazAqparat tilshisi.

«Almaty oblysynda Alakól demalys ornyna aparatyn 342 shaqyrymdyq «Taldyqorǵan –Úsharal – Alakól» tasjolyn qaıta jańartý jumystary jalǵasýda. Óńirdiń týrıstik áleýetin damytýda atalǵan jobanyń mańyzy zor. Jol ótken ǵasyrdyń 70-shi jyldarynda salynǵan bolatyn. Ony qaıta jańartý jumystary 2018 jylǵa deıin múlde júrgizilmegen», - delingen vedmostvo málimetinde.

Mınıstrliktiń málimetinshe, jumystardy «CITIC Construction Co.» kompanııasy, «ABK Avtodor NS» jáne «Qyran» JShS júzege asyrýda. Joba aıasyndaǵy jumystarǵa 2 myń adam men tehnıkanyń 800 birligi jumyldyrylǵan.

Qazirgi kezde qurylys-montajdaý jumystary joǵary qarqynmen júrgizilip jatyr. Merdiger kompanııalar asfalt-beton jabyndysyn tóseýde. Avtomobıl jolynyń tolyq boıynda qozǵalys bıyl ashylady dep josparlanǵan.