Taldyqorǵan turǵyny Túrkııaǵa joldama utyp aldy
TALDYQORǴAN.QazAqparat - Búgin Taldyqorǵanda buryn-sońdy bolmaǵan jarys uıymdastyryldy. Tuńǵysh ret bylǵary qolǵap sheberleri arasynda ótken «Patrıot» realıtı shoýynda jankúıerler de jeńimpaz atandy, dep habarlaıdy QazAqparat tilshisi.
Birneshe kórermen dámhanaǵa sertıfıkat utyp alsa, al eń basty júlde - Túrkııa eline eki adamdyq joldama boldy. Mundaı tosyn syı Taldyqorǵandaǵy ónerkásiptik ındýstrııa jáne jańa tehnologııalar kolledjiniń qyzmetkeri Ásem Áýelbekovaǵa buıyrdy.
«Men kórermen retinde kelgenmin. Ózim bir qýanysh bolatynyn ishteı sezdim. Kolledjde qarapaıym jumysshy bolyp isteımin. Osyndaı keremet jobany uıymdastyrǵandarǵa alǵysym sheksiz. Tamasha boksty kórip qana qoımaı, Túrkııa eline joldamany utyp, endi ulymyz ekeýmiz shetelge baratyn boldyq. Óte qýanyshtymyn», - dedi taldyqorǵandyq Á. Áýelbekova.
Aıta ketý kerek, oblystyq Іshki saıasat basqarmasynyń uıymdastyrýymen ótken «Patrıot» realıtı shoýyna 18-22 jas aralyǵyndaǵy jastar qatysty. Tartysty dodada Qaratal aýdanynyń turǵyny Mıras Ertanov birinshi oryndy qanjyǵalap, AQSh-qa joldama utyp aldy. 20 jastaǵy jeńimpaz Las Vegas qalasyndaǵy Freddı Roýchtyń zalynda jattyǵýǵa múmkindik aldy. Al ekinshi oryndy Raıymbek aýdanynyń týmasy Jaqsylyq Qyrǵyzáli, úshinshi oryndy Sarqan aýdanynyń namysyn qorǵaǵan Saıat Qudaıbergen jeńip aldy.
