Taldyqorǵan turǵyny syrǵanaq tebýge baryp, ajal qushty
TALDYQORǴAN. QazAqparat - Syrǵanaq tebýge barǵan Taldyqorǵan turǵyny ajal qushty. Qazir 31 jastaǵy Іlııas Qańǵabyldyń ólimine baılanysty sotqa deıingi tergeý júrip jatyr, dep habarlaıdy QazAqparat tilshisi.
Marqum bolǵan azamat Taldyqorǵandaǵy medıtsınalyq kolledjde muǵalim bolyp jumys istegen. Jaqyndary ballonmen syrǵanaǵan Іlııastyń omyrtqasy birneshe jerinen synǵanyn aıtady. Ol alǵan jaraqatynan aýrýhanaǵa jetpeı jan tapsyrǵan.
Qaıǵyly jaǵdaı Taý-Jetisý qysqy demalys ornynda bolǵan. Mundaǵy mamandardyń sózinshe, 15 shaqty adam juma kúni osy jerge demalýǵa kelgen. Kóz jumǵan pedagog ta sol toppen birge júrgen. Biraq eskertýge qaramastan, úsh adam ruqsat etilmegen jerde syrǵanaq tepken.
«Qaıtys bolǵan kisi syrǵanaýǵa bolmaıtyn jerden syrǵanaǵan. Ol sol jerde mert boldy. Eki ret eskerttik. Ol jerde ruqsat etilmegeni jóninde arnaıy belgi bar. Bári kórinip tur», - dedi Taý-Jetisý qysqy demalys ornynyń ınstrýktory Serik Isaev.
Qazir oqıǵaǵa baılanysty sotqa deıingi tergeý bastaldy.
«Atalǵan derek Eskeldi aýdandyq polıtsııa bóliminiń óndirisinde. Sotqa deıingi tergeý amaldary QR QK-niń 306-baby 3-bóligine sáıkes júrip jatyr. Arnaıy saraptama taǵaıyndalyp, istiń mán-jaıy anyqtalýda. Saraptama nátıjeleri daıyn bolǵan soń, protsessýaldy sheshim qabyldanatyn bolady», -dedi Almaty oblystyq Polıtsııa departamenti baspasóz qyzmetiniń ókili Ernar Saıdildın.
