Taldyqorǵan perzenthanasynda qursaqtaǵy sábıdi saqtaý ortalyǵy ashyldy

TALDYQORǴAN. QazAqparat – Taldyqorǵan perzenthanasynda Jetisý oblysy boıynsha qursaqtaǵy sábıdi saqtaý ortalyǵy ashyldy, dep habarlaıdy QazAqparat Densaýlyq saqtaý mınıstrliginiń resmı saıtyna silteme jasap.

Maqsat – týa bitetin damý kemistigin ýaqtyly anyqtaý, olardan bolatyn ólim-jitimniń, balalar arasyndaǵy syrqattanýshylyq pen múgedektiktiń aldyn alý.

Ortalyqta júkti áıelderge ýltradybystyq jáne bıohımııalyq skrınıng júrgiziledi. Genetıkter men akýsher-gınekologter konsýltatsııa beredi. Prenataldyq konsılıýmda uryqtyń damý patologııasy anyqtalǵan kezde bosaný tásili belgilenedi. Sondaı-aq, ortalyqta uryqtyń anyqtalǵan patologııasyn rastaý úshin ýltradybystyq dıagnostıkanyń ekinshi deńgeıi bar.

«Ortalyqtyń negizgi baǵyty – týa bitetin patologııalarmen kúresý, uryqtyń qalyptasýyna áser etetin jaǵymsyz faktorlardy joıý, týa bitetin aqaýlar men hromosomalyq aýytqýlardy anyqtaý kezinde júktilikti jalǵastyrý máselesi, jańa týǵan nárestege qajetti medıtsınalyq kómekti ýaqtyly kórsetý. Genetıka bóliminde hromosomalyq aýytqýlarǵa prenataldyq bıohımııalyq skrınıng jáne tuqym qýalaıtyn metabolıkalyq aýrýlarǵa neonataldyq skrınıng júrgiziledi», - dedi Jetisý oblysy Densaýlyq saqtaý basqarmasy basshysynyń orynbasary Áıgerim Lebaeva.

Patologııa anyqtalǵan jaǵdaıda júktilikti odan ári jalǵastyrý nemese toqtatý tásili týraly máselelerdi sheshý úshin uryq patologııasynyń sıpatyna baılanysty kóp beıindi komıssııa uıymdastyrylady. Komıssııanyń otyrysynda otbasyna anyqtalǵan aýrýdyń barlyq saldary, júktilikti úzbeý týraly sheshim qabyldanǵan kezde balanyń ómirine boljam jáne múgedektik dárejesi túsindiriledi.

Bolashaqta ortalyqta uryqtyń ınvazıvtik prenataldyq dıagnostıkasyn júrgizý josparlanyp otyr. Bul – «Hromosomalyq patologııa» dıagnozynyń sońǵy kezeńi.