Taldyqorǵan-Óskemen tasjolynyń qurylysy bir aıdan keıin bastalady
TALDYQORǴAN. QazAqparat - Taldyqorǵan-Óskemen tasjolynyń qurylysy bir aıdan soń bastalady dep josparlanýda.
Bul jóninde Investıtsııalar jáne damý mınıstri Jeńis Qasymbek Úkimet basshysynyń jetisýlyqtarmen kezdesýi barysynda málim etti, dep habarlaıdy QazAqparat tilshisi.
Atalǵan jol qurylysy boıynsha taldyqorǵandyq turǵynnyń suraǵyna jaýap bergen mınıstr, aldymen Taldyqorǵan-Aıagóz baǵyty boıynsha jóndeý jumystary bastalatynyn aıtty. Odan keıin jol qurylysy Óskemenge deıin jalǵasady. Sondaı-aq ol Úsharal-Dostyq joly jóndeletinin jetkizdi.
Aıta ketý kerek, Almaty-Taldyqorǵan tasjoly tolyqtaı jańa talapqa saı etip jańartylýda. Atalǵan joba aıaqtalýǵa jaqyn. Qazir Taldyqorǵan men Kóksý aýdanyndaǵy aralyqta joldyń qurylysy júrip jatyr. Halyq Almaty men Taldyqorǵan arasyna buǵan deıin kólikpen keminde 5 saǵattan astam ýaqyt júrse, qazir 2-2,5 saǵattyń ishinde jetýge múmkindik týdy. «Nurly jol» baǵdarlamasy aıasynda atalǵan joba boıynsha tas joldyń 245 shaqyrymy jańartylýda.
Esterińizge sala keteıik, 28 sáýir kúni Úkimet basshysy Baqytjan Saǵyntaev Almaty oblysynda jumys saparymen boldy. Ol óńir jurtshylyǵymen kezdesip, Elbasynyń Joldaýyndaǵy maqsat-mindetterdiń oryndalýyn pysyqtady, rýhanı jańǵyrý baǵytynda atqarylar jumystar jóninde málim etti. Premer-Mınıstrmen birge oblysqa 4 mınıstr keldi. Olar óz salalary boıynsha memlekettik baǵdarlamalardyń júzege asyrylý barysyn túsindirip, turǵyndar tarapynan qoıylǵan suraqtarǵa jaýap berdi.
