Taldyqorǵan-Óskemen tas jolynyń qurylysy jazda bastalady
TALDYQORǴAN. QazAqparat - Taldyqorǵan-Óskemen trassasynyń Almaty oblysy boıynsha ótetin joldyń qurylysy jazda bastalady dep kútilýde. Joba boıynsha eki oblystyń 761 shaqyrym joly jóndeledi, dep habarlaıdy QazAqparat tilshisi.
Taldyqorǵannyń shyǵa beris qaqpasynan Aqsý aýdanyna deıin birinshi kategorııaly tórt jolaqty trassa salynady. Demek, Taldyqorǵannan Aqsý aýdanyna deıin 32 shaqyrym jol birinshi kategorııaly bolsa, al ary qaraı respýblıkalyq trassa Almaty oblysynyń shekarasyna deıin 2 jolaqty bolady.
«Taldyqorǵannan Shyǵys Qazaqstan oblysynyń shekarasyna deıin joldyń uzyndyǵy 312 shaqyrymdy quraıdy. Jol qurylystaryn júrgizý úshin bul jer bes ýchaskege bólingen. Qazirgi ýaqytta jobalyq qujattary daıyndalyp jatyr. Sol qujat daıyn bolyp, memlekettik saraptamadan oń nátıjesin alǵannan keıin jol qurlysyn bastaımyz. Bul jerde bes ýchaskege bólingen jerdiń qaısysy birinshi saraptamadan oń qorytyndysyn alady, sol jerden jumysty bastaı beremiz. Taldyqorǵannan Shyǵys Qazaqstan oblysynyń shekarasyna deıingi aýmaqtaǵy jol qurylysy shamamen shilde, ne bolmasa tamyz aıynda bastalady dep josparlanýda. Qazirgi ýaqytta merdiger kompanııa daıyndyq jumystaryn júrgizip jatyr. Sol joldyń boıynda, ıaǵnı bes ýchaskege zaýyt qoıatyn jerlerin, jatahanalaryn, zerthanalaryn, keńselerin salyp, jumys istep jatyr. Al Úsharaldyń qasynda sol joldy salatyn kompanııanyń úlken ákimshilik ǵımaraty bolady. Ol jerde barlyq ınjenerleri otyrady. Odan bólek olar tehnıkalaryn ákelip jatyr», - dedi «QazAvtoJol» AQ UK Qurylys dırektsııasy Almaty oblysy boıynsha fılıalynyń dırektory Serik Kerimqulov.
Fılıal dırektorynyń aıtýynsha, Taldyqorǵan-Óskemen tas jolynyń qurylysyn Qytaıdyń merdiger kompanııasy júrgizedi. Jalpy jospar boıynsha Taldyqorǵan-Óskemen tas jolynyń qurylysy 2022 jyly aıaqtalyp, 761 shaqyrym jol jóndeledi. Naqtyraq aıtqanda, kelisimshart boıynsha qytaı mamandary respýblıkalyq trassany tórt jarym jyldyń ishinde jóndep bitýleri tıis.
