Taldyqorǵan: naýqasqa basqa toptyń qanyn quıǵan dárigerlerdi tekserý bastaldy
TALDYQORǴAN. QazAqparat - Taldyqorǵandaǵy oblystyq aýrýhanada kóz jumǵan Anarhan Qyrǵyzbaevanyń ólimine baılanysty arnaıy komıssııa quryldy. Qazir tekserý jumystary júrip jatyr, dep habarlaıdy QazAqparat tilshisi.
«Osy oqıǵadan keıin Almaty oblystyq densaýlyq saqtaý basqarmasy basshylyǵynyń buıryǵymen komıssııa qurylyp, qazir oblystyq aýrýhanany tekserý jumystary júrip jatyr», - dedi osy vedomstvanyń baspasóz hatshysy Láılim Áýbákirova.
Sondaı-aq, tekserý jumystaryn oblystyq qoǵamdyq densaýlyq saqtaý departamenti de júrgizedi. Atalǵan mekeme tekserýdi dúısenbi kúni bastaıdy.
«Shaǵymdaǵy aıtylǵan nárselerdiń bárin anyqtaımyz. Shyn mánisinde qandaı qan quıyldy, kim quıdy, nege durys anyqtamady? Basynan aıaǵyna deıin aq-qarasyn anyqtap beremiz», - dedi oblystyq qoǵamdyq densaýlyq saqtaý departamentiniń basshysy Erǵalı Sydymanov.
Marqumnyń jaqyndary oblystyq prokýratýra jáne polıtsııa departamentine de aryz túsirgen.
«Bizdiń janymyzǵa qatty batatyny - aýrýhana basshylyǵynyń «naýqasqa bir ret úshinshi toptaǵy qan quıyldy» dep jalǵan qujat jasatyp, isti jaba salýǵa tyrysqandyǵy. Sondyqtan, bul jerde eshqandaı kelisimge kelý, keshirim degen bolmaıdy. Jazyqtylar mindetti túrde jazasyn alýy tıis», - deıdi marqumnyń balalary.
Al gemoglobıni 50-di kórsetken naýqasqa úshinshi toptyń da, tórtinshi toptyń da qanyn quıǵandaryn dárigerler moıyndap otyr.
«Biz tórtinshi toptyń qanyn 4 ret quıdyq. Úshinshi toptyń qanyn eki ret quıdyq. Qan tobyn anyqtaý qıyn bolǵandyqtan, biz shatasqanymyzdy moıyndap otyrmyz», - dedi Almaty oblystyq aýrýhanasynyń bas dárigeri Murat Rahmetov.
Esterińizge sala keteıik, buǵan deıin oblystyq aýrýhanaǵa óz aıaǵymen barǵan Anarhan Qyrǵyzbaevaǵa dárigerler basqa toptyń qanyn 4 ret quıyp, naýqas qınalyp qaıtys bolǵany jóninde habarlaǵan bolatynbyz.
