Taldyqorǵan mańyndaǵy zıratta 3 qabir qazylyp, búlingen
TALDYQORǴAN. QazAqparat – Taldyqorǵan mańyndaǵy hrıstıandardyń zıratynda áldekim qabirlerdi qazǵan. Polıtsııa bul fakti boıynsha qylmystyq is qozǵady, dep habarlaıdy QazAqparat tilshisi.
Atalǵan jaıttyń vıdeosy áleýmettik jelide tarady. Beınejazba avtory Eńbek aýylyndaǵy zıratta jerlengenderdiń qabirin belgisiz bireýlerdiń qazyp ketkenin aıtady.
Polıtsııa bul faktini birden tirkep, qazir isti jan-jaqty tergep jatyr.
«Taldyqorǵan mańynda Eńbek aýylyndaǵy 3 qabirdiń búlingeni anyqtaldy. Aldyn ala boljam boıynsha, qabirlerdi jan-janýarlar qazyp ketýi múmkin. Barlyq boljamdar eskerilip, tergeý barysynda nazarǵa alynady. Osy fakti QR QK 314-baby (Ólgen adamdardyń máıitterin jáne olar jerlengen jerlerdi qorlaý) 1-bóligine sáıkes tirkeldi», - dep málimdedi Jetisý oblystyq polıtsııa departamenti baspasóz qyzmetinen.
Aıta keteıik, isti Taldyqorǵannyń polıtsııasy tergep jatyr. Atalǵan fakti oblystyq polıtsııa departamenti basshylyǵynyń qatań baqylaýynda.
Vıdeodan alynǵan kadr
