Taldyqorǵan mańyndaǵy ushaq apaty: Ushqyshqa úkim ózgertildi
TALDYQORǴAN. QazAqparat - Astanadaǵy QR Áskerı sotynda Taldyqorǵan mańynda apatqa ushyraǵan Sý-27 ushaǵynyń pıloty Ádilbek Ysqaqovtyń apellıatsııalyq shaǵymy qaralyp, úkim ózgertildi. Bul týraly QazAqparat tilshisine ushqyshtyń jary Ajar Ysqaqova málim etti.
Sot sheshimin 61 kún ızolıatorda jatyp kútken Ádilbek Ysqaqov qazir otbasyna oraldy. Onyń jazasy shartty túrge aýystyryldy. Ushqyshtyń ózi oǵan taǵylǵan aıyppen túbegeıli kelispeıdi. Olar endi kassatsııalyq sotqa shaǵymdanbaq. Ádilbek Ysqaqovty aqtap alýǵa onyń zaıyby kirisken. Sebebi ózi de áskerı salada qyzmet etedi.
«Joldasyma taǵylǵan bapty ózgertti. Ol QR QK-niń 63-baby 2-bóligi boıynsha kináli dep tanylyp, 3 jylǵa shartty túrde sottaldy. Biraq taǵylǵan aıyppen kelispeımiz, ary qaraı shaǵymdanatyn bolamyz», - dedi Ajar Ysqaqova.
Eske salaıyq, 2016 jyldyń 21 jeltoqsany kúni Taldyqorǵan mańynda túngi jaǵdaıda oqý-jattyǵýdy oryndaý kezinde QR Qorǵanys mınıstrliginiń 21751 áskerı bóliminiń Sý-27 ushaǵy apatqa ushyraǵan bolatyn.
Bıyl 12 qańtar kúni Taldyqorǵandaǵy áskerı sotta Ádilbek Ysqaqov QR Qylmystyq kodeksiniń 464-babymen kánili dep tanylyp, 4 jylǵa sottaldy. Al 15 qańtarda Taldyqorǵan garnızony áskerı sotynyń tóraǵasy Rınat Aqpar sot sheshimine túsinikteme bergen edi.
«Sý-27 ushaǵynyń janarmaıyn teksermeı, ushaqty qabyldap, kókke kóterilgeni anyqtaldy. Ushyp bara jatqanda otynnyń az mólsheri saldarynan apattyq janarmaı balansyn kórsetetin qurylǵylar iske qosylǵan. Alaıda áskerı qyzmetker ushý erejelerin buza otyryp, qurylǵylardyń senimdiligine kúmán keltirgen. Basshysyna onyń janarmaıynyń qalǵan bóligi týraly shyndyqty aıtpaı, qate aqparat bergen», - dedi R. Aqpar.
