Taldyqorǵan mańynda zańsyz balyq tasymaldaǵandar ustaldy
TALDYQORǴAN. QazAqparat - Almaty-Óskemen tasjolynyń Taldyqorǵan qalasyna kireberisinde zańsyz balyq tıep ótpek bolǵandar ustaldy. Gazel avtokóliginen eshqandaı qujaty joq 700 keliden astam balyq tárkilendi, dep habarlaıdy QazAqparat tilshisi.
Almaty oblystyq Polıtsııa departamenti tabıǵatty qorǵaý polıtsııasynyń qyzmetkerleri oblys ákimdigi janyndaǵy janýarlar dúnıesin qorǵaý jónindegi jedel tobymen birge «Brakoner» is-sharasy barysynda kúdik keltirgen Gazel markaly kólikti toqtatqan. Teksere kele, onyń júk salǵyshynda eshqandaı qujaty joq iri kólemde kókserke balyǵy tıelgeni belgili boldy. Ákimshilik quqyqbuzý zańnamalary boıynsha tergeý amaldary bastalyp, balyqtyń ıesi, kóliktiń baǵyty anyqtalýda. Tárkilengen kókserke balyǵy ólshenip, ýaqytsha saqtaýǵa arnaıy qoımaǵa tapsyryldy.
«Jyl basynan beri tabıǵat qorǵaýshylar zańsyz balyq aýlaý boıynsha 50-ge jýyq zań buzý faktisin tirkedi. Bir qylmystyq is qozǵaldy. 1700 kg balyq tárkilenip, memleketke 2 mln teńgeden astam shyǵyn keltirilgeni týraly hattama toltyryldy», - deıdi Almaty oblystyq orman sharýashylyǵy jáne janýarlar dúnıesin qorǵaý aýmaqtyq ınspektsııasynyń memlekettik ınspektory Rınat Qýmashev.
