Taldyqorǵan mańynan zańsyz tógilgen dári-dármek tabyldy
TALDYQORǴAN. QazAqparat - Taldyqorǵan qalasyna qarasty Kóktal aýylynyń mańyna dári-dármek tógip ketken. Merzimi ótken qaýipti preparatardy kimniń tastap ketkeni belgisiz. Endi aýyldaǵy balalar osy hımııalyq zattarmen oınap, úılerine tasyp jatyr, dep habarlaıdy QazAqparat tilshisi.
Kóktal aýylynyń turǵyny Hanshaıym Baqtyǵaımova nemeresiniń bir qorap dárini úıine alyp kelgende, qatty shoshyǵanyn aıtady. Endi ol osy zattarmen oınap júrgen balalar ýlanyp qalady ma dep alańdaıdy. Dáriler qorap-qorap bolyp shashylyp jatyr. Onyń ishinde gemodez, dıaformın, depakın syndy birneshe dárilerdiń túrleri bar. Al Almaty oblystyq densaýlyq saqtaý basqarmasyndaǵy dári-dármekpen qamtamasyz etý bóliminiń basshysy Gúlǵaısha Imanbekova bul zattar dárihanalarǵa tıesili bolýy múmkin deıdi. Sebebi jekemenshik uıymdar jaramsyz bolyp qalǵan dúnıelerdi joıý úshin de qarajat tóleýi tıis eken.
"Olar arnaıy joıý peshterine ótkizip, aqy tóleýleri kerek. Meniń oıym, qarajat tólemeı, shyǵyn shyǵarmas úshin aýyldyń shetine shyǵaryp, laqtyryp tastaý olarǵa tıimdi bolýy múmkin" , - deıdi bólim basshysy.
Ákimdiktegiler de bul jaıttan habarsyz bolyp shyqty.
"Kóktal aýylynda arnaıy qoqys tógetin jer joq. Bizde qalada tek Ótenaı aýylynda ǵana bar. Buny bir kisiler tógip ketken ǵoı. Endi biz tekseremiz. Polıtsııa qyzmetkerlerimen ol kisilerdi taýyp, aıyppul salyp, tekserý jumystaryn júrgizemiz", - deıdi Erkin aýyldyq okrýgi ákiminiń mindetin atqarýshy Qanat Rysbekov.
Oblystyq densaýlyq saqtaý basqarmasyndaǵylar da barlyq dárilerdiń kózin joıamyz deıdi. Negizinde zańǵa sáıkes merzimi ótken dáriler joıylýy tıis. Ol úshin mınıstrliktiń arnaıy bekitken buıryǵy bar.
