Taldyqorǵan kóshesinde 4 jastaǵy balany ıt talady
TALDYQORǴAN. QazAqparat - Taldyqorǵan qalasynda balabaqshadan qaıtyp kele jatqan 4 jastaǵy balaǵa ıt tap bergen, dep habarlaıdy QazAqparat tilshisi.
«Jańa ǵana 9 synypta oqıtyn ulym kishkentaı qyzymdy balabaqshadan alyp kele jatqanda kóshedegi ıt 4 jastaǵy qyzyma tap berip, tistep aldy. Abyroı bolǵanda ótip bara jatqan adamdar birden balamdy ıtten arashalap, kómek kórsetip, ıtti baılap tastady. Áıteýir, kýrtkanyń qalyńdyǵynan bala jaralanbaǵan. Biraq qatty shoshynyp qalǵan. Qol-aıaǵy dirildep, óńi qashyp ketken. Veterınarııaǵa qońyraý shalyp edim, áli habar joq. San syltaýdy aıtyp, balamdy qapqan ıtti úıińizge baılap qoıyńyz dep ózimdi shoshytty. Tek polıtseıler kelip, ıttiń ıesin anyqtaımyz dedi», - deıdi taldyqorǵandyq Shynar Serikqalıqyzy.
Shynardyń aıtýynsha, oqys oqıǵa búgin Taldyqorǵanda Balpyq bı men Daraboz ana kóshesiniń qıylysynda bolǵan. Qatty shoshynǵan bala men ana dalaǵa shyǵýdan úreılenip otyr. Olar jaýapty mamandardan qalany qańǵybas ıtterden tazalaýdy surady.
