«Taldyqorǵan-Qalbataý-Óskemen» jol qurylysy qashan aıaqtalady
«Taldyqorǵan – Qalbataý – Óskemen» jáne «Qalbataý-Maıqapshaǵaı» avtojoldarynyń qurylysyn 2022 jyly aıaqtaý josparlanǵan bolatyn. Sonymen qatar, merdigerlik uıymdar jol-qurylys materıaldary qunynyń qymbattaýyna silteme jasaı otyryp, jumys qunyn túzetý ótinishimen júgindi. Osy jobalardy iske asyrý boıynsha kelisimsharttar «tolyq daıyn» sharttarmen jasalǵanyn eskere otyryp, Qazaqstan Respýblıkasynyń azamattyq zańnamasyna sáıkes qurylys materıaldarynyń qymbattaý táýekelderine merdigerlik uıymdar jaýapty bolady. Osyǵan baılanysty, qoldanystaǵy zańnamaǵa sáıkes jobalarǵa túzetýler engizý múmkin emes. Bul rette júrgizilgen aýdıtorlyq tekserýler barysynda avanstyq qarajatty maqsatsyz paıdalaný, jumystardy júrgizý kestesinen artta qalý, sondaı-aq jumystardyń barlyq kólemin joǵary bas merdigerlik komıssııalardy ustaı otyryp, qosalqy merdigerlik uıymdarǵa berý faktileri anyqtaldy», - dedi Muhtar Tileýberdi jaýabynda.
Onyń atap ótýinshe, qazirgi ýaqytta merdigerlik uıymdarmen jobalarǵa túzetý engizbeı, kózdelgen qun aıasynda jumystardy oryndaý týraly kelissózder júrgizilip jatyr.
«Kelissózder qorytyndysy boıynsha oń nátıje bolmaǵan jaǵdaıda, merdigerlik uıymdarmen sharttardy buzý josparlanýda. Sondaı-aq, joǵaryda atalǵan jobalardy aıaqtaý maqsatynda qazir jumyldyrylǵan qosalqy merdigerlik uıymdarmen jumystardy jalǵastyrýǵa arnalǵan sharttarǵa qol qoıý shartymen ózge qarjy ınstıtýttarynan qaryzdar tartýdyń nusqalary qaralýda. Bul tehnıka men personaldy jumyldyrý ýaqytyn qysqartýǵa múmkindik beredi. Júrgizilip jatqan jumystardy eskere otyryp, 2023 jyly «Taldyqorǵan – Qalbataý – Óskemen» jobasyn, al 2024 jyly «Qalbataý-Maıqapshaǵaı» jobasyn iske asyrýdy aıaqtaý boljanady», - dedi ol.
