Taldyqorǵan qalasynyń əkimdigine saýdagerler taǵy keldi
TALDYQORǴAN. QazAqparat - Búgin Taldyqorǵan qalasy ákimdiginen kóshe boıynda saýda jasaýǵa ruqsat surap, 20-shaqty saýdager keldi, dep habarlaıdy QazAqparat tilshisi.
Nesıeden kózi ashylmaı, bala-shaǵanyń qamymen júrgen olar naýryz aıynda saýda qyza túsetinin aıtyp otyr. Alaıda, bul joly da əkimdikten ədettegi jaýapty estip qaıtty. 
«10 naýryzǵa deıin Birjan sal jáne Gaýhar ana kóshelerinde saýda jasaýǵa ruqsat berseńizder. Saýdanyń qyzatyn shaǵy. Ótelmegen nesıelerimiz bar edi. Bir kómek bolar edi», - deıdi Marjan esimdi saýdager.
Qala əkiminiń baspasóz qyzmetinen málim etkendeı, jınalǵandarǵa Taldyqorǵan qalasy ákiminiń orynbasary Nurlan Mámbetjanov jaýap bergen. «Keshirińizder, biraq kóshede saýda jasaýǵa ruqsat joq. Arnaıy zań bar. Onyń aıasynda, saýda tek belgilengen aýmaqta jasalýy kerek. Oǵan baǵynbaǵan azamattar zań buzýshylar bolyp esepteledi jáne zań boıynsha jaýapqa tartylady. Sondyqtan, arnaıy saýda úılerinde, belgilengen oryndarda ǵana saýda jasańyzdar!», - dep atap ótti qala ákiminiń orynbasary.
«Taldyqorǵan qalasyndaǵy zańsyz saýda máselesi asa ózekti. Qala kóshelerinde jabaıy saýdamen aınalysyp júrgen 40 shaqty azamatpen únemi jumys jasalyp keledi. Olarǵa saýda úılerinen, bazarlardan jeńildikpen oryndar da usynyldy. Alaıda, saýdagerler orynǵa aqy tólegisi kelmeıdi. Bir sózben aıtqanda, zańǵa baǵynǵylary joq», - deıdi qalalyq kásipkerlik bóliminiń basshysy Gafýr Kýzýbaev.
Biraq saýdagerlerdiń sózinshe, usynylǵan saýda oryndary olardyń kóńilinen shyqpaıdy. Baǵa qymbat, əri barlyq jaǵdaı jasalmaǵan kórinedi.
