Taldyqorǵan qalasynyń ákimi oqýshylarǵa sáttilik tiledi
TALDYQORǴAN. QazAqparat - Búgin Taldyqorǵan mektepterinde alǵashqy qońyraý soǵylyp, Bilim kúnine arnalǵan saltanatty jıyndar ótti. Jetisýdyń bas qalasynda jalpy orta bilim beretin 28 mektep bar. Onda 29 990 oqýshi bilim alady, dep habarlaıdy QazAqparat tilshisi.
«Bilekti birdi, bilimdi myńdy jyǵady degen qanatty sóz bar qazaqta. Bolashaqta qandaı azamat bolatyndaryńyz sizderdiń búgingi bilimge degen kózqarastaryńyzǵa baılanysty bolady. Sondyqtan, jańa oqý jylynda jańa tabystar tileımin. Bilim kókjıekterińiz ulǵaıyp, ǵylymǵa degen qulshynystaryńyz arta bersin!», - dedi Nazarbaev zııatkerlik mektebiniń oqýshylaryn arnaıy quttyqtaı kelgen Taldyqorǵan qalasynyń ákimi Baǵdat Qarasaev.
Qala ákimi atap ótkendeı, búginde Taldyqorǵanda oqýshylardyń bos ýaqytyn tıimdi paıdalaný úshin 60-tan astam úıirmesi bar Oqýshylar saraıy salynǵan. Qazirgi kezde 300 oryndyq mýzyka mektebiniń qurylysy júrip jatyr. «Mine munyń barlyǵy sizder úshin! Bolashaqta rýhanı jaǵynan myqty, ultjandy azamattar ósirý úshin jasalǵan jaǵdaı», - dedi qala ákimi.
Taldyqorǵandaǵy fızıka-matematıkalyq baǵyttaǵy Nazarbaev zııatkerlik mektebiniń tabaldyryǵyn bıyl 60 búldirshin attap otyr. Bilim ordasynda 900-ge tarta oqýshy bar. Mektep 7 jyl buryn iske qosylǵan. Búginde dál osy qara shańyraqtan shyqqan 70 túlek Nazarbaev ýnıversıtetinde bilim alyp jatsa, 53 túlek álemdik deńgeıdegi joǵary oqý oryndarynda oqyp júr.
Saltanatty jıyn barysynda oqý ordasynyń jazdaǵy olımpıadalar men ózge de bilim saısynda top jarǵan oqýshylary marapattaldy.
