Taldyqorǵan qalasy ákiminiń eks-keńesshisi sottaldy
TALDYQORǴAN.QazAqparat - Taldyqorǵan qalasy ákiminiń eks-keńesshisi Almasbek Sadyrbaev bir jylǵa bas bostandyǵynan aıyryldy. Sot úkimi oqylǵannan keıin aıyptalýshynyń qolyna birden kisen taǵyldy, dep habarlaıdy QazAqparat tilshisi.
Atalǵan iste Taldyqorǵan qalasy ákiminiń orynbasary Asqar Tutybaev eks-keńesshi Almasbek Sadyrbaevty sotqa berip otyr. Almasbek Sadyrbaev QR QK 380-baby birinshi bóligi (bılik ókiline qatysty ómirine nemese densaýlyǵyna qaýipti emes kúsh qoldaný) boıynsha aıypty dep tanyldy. Sondaı-aq, jábirlenýshi Asqar Tutybaev aıyptalýshydan 10 mln. teńge moraldyq shyǵyn talap etken bolatyn. Sot bul talapty ishinara qanaǵattandyrdy. Sottalýshy Almasbek Sadyrbaev Asqar Tutybaevqa 300 myń teńge moraldyq shyǵyn ótep berýge mindetteldi.
Esterińizge sala keteıik, buǵan deıin Almasbek Sadyrbaev qala ákiminiń orynbasary A. Tutybaevpen ákimdikte tóbeleskendigi týraly Feısbýktegi paraqshasynda jazǵan bolatyn. Al ákim orynbasary bul jaıtty joqqa shyǵardy. Tutybaevtyń sózinshe, olar tóbelespegen. Tek Almasbek Sadyrbaev ony balaǵattap, urǵan. Al istiń osynshama nasyrǵa shabýyna Tutybaevtyń qujatqa qol qoımaýy sebep bolǵanǵa uqsaıdy. Alaıda ákim orynbasary «alǵashqy qujatqa qol qoıyp berdim, biraq onysy jaramsyz bolyp qaldy» degen bolatyn.
Endi Sadyrbaev qaýipsizdik deńgeıi tómen túzetý mekemesinde jazasyn óteıtin bolady.
