Taldyqorǵan ızolıatorynda tergelip jatqan 200-ge jýyq azamat daýys berdi

TALDYQORǴAN. QazAqparat - Taldyqorǵannyń tergeý ızolıatorynda eki júzge jýyq tergeýdegiler daýys berdi, dep habarlaıdy QazAqparat tilshisi.

Jetisý oblysynda tergeýdegiler, sondaı-aq úkim zańdy kúshine enbegen azamattar shette qalmaı, ózderiniń saılaý quqyǵyn iske asyrdy.

Kezekten tys prezıdent saılaýy 20 qarashada ótti.

Almaty jáne Jetisý oblystary boıynsha QAJD qarasty №71 tergeý ızolıatorynda ornalasqan №1009 saılaý ýchaskesinde daýys berý tańǵy 07.00-den bastaldy.

Buǵan deıin QAJ qyzmetkerleri saılaýshylarǵa prezıdenttikke kandıdattarmen tanysý úshin aqparattyq materıaldar usynǵan bolatyn.

«Daýys berý zań men quqyqtyq normalardyń talaptaryna sáıkes ótti. Daýys berýge arnalǵan jáshikter men kabınalar ornatyldy. Bólme beınebaqylaýmen jabdyqtalǵan. Zańbuzýshylyqtar men eskertýler bolǵan joq», - dedi saılaý ýchaskesiniń tóraǵasy Madııar Ýmırbaev.