Taldyqorǵan áýejaıynda órt boldy, eki adam zardap shekti
ASTANA. QazAqparat - Taldyqorǵan áýejaıy aýmaǵynda bolǵan órtten eki adam zardap shekti, dep habarlaıdy «QazAqparat» HAA tilshisi QR Investıtsııalar jáne damý mınıstrliginiń resmı ókili Murat Jumanbaıǵa silteme jasap.
«Taldyqorǵan áýejaıynyń habarlaýynsha, 2017 jyldyń 15 maýsymy kúni 14:15-te janar-jaǵarmaı qoımasynyń sorǵy stansasy mańynda (perronnan 1,2 shaqyrym qashyqtyqta ornalasqan) janarmaı quıatyn MAZ markaly ATZ-10 kóligi órtengen. Jalyn áýejaıdyń órtke qarsy qyzmetiniń (2 tehnıka) jáne Taldyqorǵan Tótenshe jaǵdaılar departamentiniń qatysýymen saǵat 20.30-da aýyzdyqtaldy», - dep habarlady Murat Jumanbaı.
Onyń aıtýynsha, órt saldarynan 1979 jyly týǵan janar-jaǵarmaı tehnıgi jáne 1973 jyly týǵan áýe qaýipsizdigi qyzmetiniń ınspektory zardap shekti. Olar Taldyqorǵannyń kópsalaly aýrýhanasyna jetkizildi. Aldyn ala málimetterge sáıkes, zardap shekkenderdiń jaǵdaıy «aýyr» dep baǵalanýda.
«Áýejaı qalypty rejimde jumys istep tur. Saǵat 17:30-da áýejaıda Taldyqorǵan-Astana baǵytyndaǵy «SKAT» AQ áýe kompanııasynyń reısine esh bógetsiz qyzmet kórsetildi. Qazirgi ýaqytta Úshtóbe stansasy jelilik ishki ister bólimi men kóliktegi ІІD qyzmetkerleri oqıǵanyń mán-jaıyn anyqtaýda», - dep habarlady resmı ókil.
