Taldyqorǵan áýejaıyna jańa ushaqtar satyp alyndy
TALDYQORǴAN.QazAqparat - Búgin Taldyqorǵan áýejaıynda Chehııada jasalǵan L-410 modeldi eki ushaqtyń tanystyrylymy ótti, dep habarlaıdy QazAqparat tilshisi Almaty oblysy ákimdiginiń baspasóz qyzmetine silteme jasaı otyryp.
Oǵan oblys ákimi Amandyq Batalov, «BRK-Lızıng» AQ basshylyǵy men chehııalyq synaýshy-ushqyshtar qatysty. Áýe kemeleri «BRK-Lızıng» AQ kómegimen satyp alynyp, odan ári ınfraqurylymdyq «Nurly jer» memlekettik baǵdarlamasynyń aıasynda qarjylyq lızıngige beriledi
2018 jyly shyqqan, 19 oryndyq L-410 ushaqtaryn «Jetisý» avıakompanııasy» AQ jergilikti áýe júıesine qyzmet kóresetý úshin aldy. Onyń bireýi Taldyqorǵan - Úsharal - Taldyqorǵan, Almaty - Úsharal - Almaty baǵytyna ushatyn bolady. Al ekinshisi sanavıatsııa ushaǵy retinde paıdalanylady.
Jaǵymdy jańalyqpen quttyqtaǵan oblys ákimi Amandyq Batalov ushaq satyp alardyń aldynda onyń ushý-tehnıkalyq sıpattamasy tolyqtaı zerttelgenin, onyń korpýsyn bezendirý dızaınyn óńirdiń mamandary daıyndaǵanyn atap ótti.
«Búgin biz qýanyshty jaǵdaıǵa jınalyp otyrmyz. Taldyqorǵan áýejaıyna bizdiń arnaıy tapsyrysymyzben Chehııada jasalǵan jańa ushaqtar kelip qondy. Bular shaǵyn ushaqtar bolsa da, ishki reısterdi qamtamasyz etýde mańyzy zor bolmaq. Memleket basshysy ishki týrızmdi belsendi damytýdy tapsyrdy. Endi Alakól jaǵalaýynda demalǵysy keletinder úshin Úsharalǵa ushaqpen jetýge múmkindik týyp otyr», - dedi A. Batalov. Sol sııaqty Astana qalasymen áýe baılanysy úshin 50 oryndyq ushaq alý aldaǵy josparda bar ekenin de tilge tıek etti.
Aıta keterligi, Aircraft Industries - Chehııadaǵy jolaýshy ushaqtaryn óndirýshi iri kompanııalardyń biri. Avıatsııalyq óndiriste kópjyldyq tájirıbesi bar. L-410 modeldi áýe kemeleri álemniń 50-den astam elinde qyzmet kórsetedi, qaýipsizdik jáne únemdilik jaǵynan zaman talaptaryna jaýap bere alady. Eń joǵarǵy kreıserlik jyldamdyǵy 335 km/saǵ, 1 400 shaqyrymǵa deıin usha alady.
