Taldyqorǵan áskerı gospıtalinde dárigerler otbasy qyzmet etedi
Ǵalymbek pen Zýlfııa Aqtóbedegi medıtsına ınstıtýtynyń qabyrǵasynda tanysqan. Stýdent bolyp júrgen shaǵynda shańyraq kóterdi. Joǵary oqý ornyn támamdaǵan medıtsına mamandarynyń basym bóligi áskerı mindetti bolyp esepteledi. Sondyqtan leıtenant Ǵalymbek Tilekov úsh jyldyq áskerı boryshyn óteý úshin Almaty oblysyna keldi. 2004-shi jyldan beri eki-úsh áskerı bólimde túrli qyzmetterdi atqardy. Qazir gospıtalde sáýleli dıagnostıka bóliminiń meńgerýshisi. Al joldasy Zýlfııa terapevt dáriger.
Taldyqorǵandaǵy áskerı gospıtal desantty-shabýyldaýshy áskeriniń qaramaǵynda bolǵandyqtan ondaǵy qyzmetkerlerdiń bári sol áskerı bólim tártibimen júredi. Dárigerler de desantshylardyń normatıvterin, oqý-jattyǵýlaryn oryndaıdy. Ǵalymbek Tilekovtyń aıtýynsha, áskerı dárigerlerdiń júktemesi jaýyngerler men ofıtserlerden kem emes. Olar da sarbazdar sııaqty qarý asynyp, ondaǵan shaqyrymdar júgirip, nysanalardy dál kózdep, kez kelgen ýaqytta urys júrgizýge daıyn bolýy tıis.
Ádette áskerı qyzmet áıel zatyna jat deıtinder kóp. Degenmen úsh balanyń anasy Zýlfııa Daýylbaeva bárine de úlgerýge tyrysady. Sebebi ol úshin ana bolý - baqyt, áskerı qyzmet - Otan aldyndaǵy abyroıly boryshy. Al adam emdeý - súıip tańdaǵan mamandyǵy.
Qyzmet arasynda Ǵalymbek áskerı gospıtaldegi zamanaýı qondyrǵylardy stýdentterge tanystyryp, tájirıbeden ótkizedi. Al jumystan qoly qalt etkende erli-zaıyptylar óz shańyraqtaryna asyǵady. Bir qyz eki ulyn eńbekke baýlyp, úı sharýasyna úıretkendi unatady. Ázirshe balalarynan tek úlken qyzy Aqjanat dáriger bolýdy armandap júr.
Jýyrda áskerı dárigerler jubynyń Taldyqorǵan gospıtalindegi 5 jyldyq qyzmet merzimi aıaqtalady. Basshylyq olardy qaı jaqqa baǵyttaıtyny áli belgisiz. Belgilisi, Qazaqstannyń qaı buryshynda qyzmet etse de, olar súıip tańdaǵan mamandyqty áskerı boryshpen ushtastyrady.
