Taldyqorǵan ákiminiń orynbasary men eks-keńesshiniń soty keıinge qaldyryldy
TALDYQORǴAN. QazAqparat - Taldyqorǵan qalasy ákiminiń orynbasary Asqar Tutybaev pen Taldyqorǵan qalasy ákiminiń eks-keńesshisi Almasbek Sadyrbaevqa qatysty sot otyrysy keıinge shegerildi, dep habarlaıdy QazAqparat tilshisi.
Іs boıynsha basty sot otyrysy 28 tamyzǵa belgilengen bolatyn. Saǵat 16:30 da bastalǵan protseske jábirlenýshi, aıyptalýshy, kýágerler men BAQ ókilderi de birneshe mınýt buryn erte keldi. Alaıda sot protsesi bastalmaı jatyp, aıaqtaldy. Sebebi, aıyptalýshy Almasbek Sadyrbaev qolyna aıyptaý aktisin almaǵan, ispen tanyspaǵan bolyp shyqty. Endigi sot otyrysy 6 qyrkúıekke belgilendi. Protsess saǵat 11:00-de Taldyqorǵan qalalyq sotynda ótpek.
Atalǵan iste Taldyqorǵan qalasy ákiminiń orynbasary Asqar Tutybaev eks-keńesshi Almasbek Sadyrbaevty sotqa berip otyr. Qazir Almasbek Sadyrbaevqa QR QK 380-baby birinshi bóligi (bılik ókiline qatysty ómirine nemese densaýlyǵyna qaýipti emes kúsh qoldaný) boıynsha aıyp taǵylýda.
Esterińizge sala keteıik, buǵan deıin Almasbek Sadyrbaev qala ákiminiń orynbasary A. Tutybaevpen ákimdikte tóbeleskendigi týraly Feısbýktegi paraqshasynda jazǵan bolatyn. Al ákim orynbasary bul jaıtty joqqa shyǵardy. Tutybaevtyń sózinshe, olar tóbelespegen. Tek Almasbek Sadyrbaev ony balaǵattap, urǵan. Al istiń osynshama nasyrǵa shabýyna Tutybaevtyń qujatqa qol qoımaýy sebep bolǵanǵa uqsaıdy. Alaıda ákim orynbasary «alǵashqy qujatqa qol qoıyp berdim, biraq onysy jaramsyz bolyp qaldy», degen bolatyn.
