Taldyqorǵan ákimi Dastan Shaltabaevqa qatysty qyzmettik tekseris bastaldy
TALDYQORǴAN. QazAqparat - Taldyqorǵan qalasynyń ákimi Dastan Shaltabaevqa qatysty qyzmettik tekseris bastaldy. Bul jóninde Almaty oblysy ákiminiń baspasóz hatshysy Ǵalymurat Júkel málim etti, dep habarlaıdy QazAqparat tilshisi.
«Taldyqorǵan qalasynyń ákimi Dastan Shaltabaevqa qatysty qyzmettik tekseris aıaqtalysymen qosymsha tolyq málimet beretin bolamyz. Keshe Almaty qalasynda toqtatylǵan kóliktiń ishinen tapansha jáne dollar aqsha tabylǵan. Sol kólikti tizgindegen qala ákiminiń uly bolýy múmkindigi aıtylýda. Onyń Dastan Shaltabaevtyń uly ma, joq pa anyqtap jatyr. Sondaı-aq tabylǵan aqshanyń qaıdan shyqqany, onyń ne aqsha ekeni tekserilýde», - dedi Ǵalymurat Júkel.
Degenmen, baspasóz hatshysy aqparat rastalǵan jaǵdaıda qala ákimine naqty qandaı shara qoldanylatynyn aıta almady. Al Dastan Shaltabaev ákimdik qyzmetin, ıaǵnı jumysyn jalǵastyryp jatqanyn málim etti.
Aıta keteıik, 28 naýryz kúni Almaty qalasynda tártip saqshylary aldynǵy terezesi qarańǵylanǵan Toyota Camry kóligin toqtatqan. Biraq ony tizgindegen azamatta júrgizýshi kýáligi bolmaǵan jáne kóliktiń ishinen travmatıkalyq tapansha men dollar valıýtasynda aqsha tabylǵan.
«Bul zattardyń kimge tıesili ekenin ol túsindire almady. «Meniki emes» dep aqtaldy. Kóliktiń esepten shyǵarylǵany, alaıda qaıta tirkelmegeni belgili boldy. Qazir oǵan qatysty QR QK 287-babynyń 2-bóligimen qarý jaraqty saqtaý, ustap júrý, satý boıynsha qylmystyq is qozǵaldy. Kólik ıesi mashınasyn bireýge ruqsatsyz bergeni úshin ákimshilik jaýapkershilikke tartyldy. Kólik aıyp turaǵyna qoıyldy», - dedi qalalyq Polıtsııa departamentinen.
