Taldyqorǵan ákimdigi memlekettik qyzmet kórsetýdiń jańa júıesin usynady (FOTO)
TALDYQORǴAN. QazAqparat - Taldyqorǵan ákiminiń apparaty memlekettik qyzmet kórsetý salasyna jańalyqtar engizdi. Endi ákimdikte qala turǵyndaryn kúzet polıtsııasy emes, ár túrli máseleler boıynsha keńes beretin maman kútip alady. Taldyqorǵan qalasynyń ákimi apparatynyń jetekshisi Gaýhar Shoqanovanyń aıtýynsha, memlekettik qyzmet kórsetý sapasyn jaqsartý úshin osyndaı sheshim qabyldanǵan.
«Atalǵan tásildiń tıimdiligi joǵary ekeni is júzinde dáleldendi. Buryn qalalyqtar qajet keńesti alý úshin mamandardy kúzet polıtsııasynda kútip otyratyn. Endi olardy birinshi kezekte keńes berýshi maman kútip alyp, qajet qujattardy toltyrýǵa kómektesedi. Bul úshin ótinishti durys toltyrý úlgileri qoıylǵan. Eger keıbir ótinishter onyń quzyretinde bolmasa, nusqaýlyqpen joǵarǵy jaqqa jetkizedi. Jáne biz arnaıy kútý zalyn jasaqtaýdy da qarastyrdyq», - dep atap ótti apparat jetekshisi G.Shoqanova.
Óz kezeginde, qala turǵyndary jańa júıeniń yńǵaıly ekenin aıtýda.
«Men jer telimin alý úshin qujattarymdy ótkizýge keldim. Ákimdik qyzmetkeri bárin muqııat túsindirdi jáne men esh qıyndyqsyz qujattarymdy ótkizdim. Halyqtyń jaǵdaıyn jasap jatqandary meni qýantady», - dedi qala turǵyny Ersin Jumaǵulov.
Sol mezette ákimdik memlekettiń qyzmet kórsetýdiń sapasyn jaqsartý barlyq memlekettik qurylym qyzmetkerleriniń aldyna qoıylǵan basty mindetterdiń biri ekenin aıtty. 
