Taldykólge qurylystan keıin ań men qus orala ma – maman jaýap berdi
NUR-SULTAN. QazAqparat – Búginde Nur-Sultan qalasy mańyndaǵy Kishi Taldykóldiń taǵdyry qoǵamda keńinen talqylanyp jatyr. Ekojanashyrlar kóldi saqtap qalý maqsatynda túrli shara uıymdastyryp, bılik pen qoǵam nazaryn aýdarýda. Osy oraıda kópshilik kóńilindegi kúdik pen saýalǵa elorda ákimdigi jaýap berdi, dep habarlaıdy QazAqparat tilshisi.
«Nur-Sultan qalasy aýmaǵynda 7,5 myń gektardy quraıtyn sý qoımasy bar. Sol sııaqty sý qoımalary jer jáne sý týraly kodekske sáıkes jer kadastrinde resmı túrde tirkelýi tıis. Búginde elordaǵa qarasty Maıbalyq, Taldykól, Esil ózeni jáne Aqbulaq sekildi sý qoımalary bar. Osy oraıda Nur-Sultan qalasynyń sý qory qatarynda Kishi Taldykól degen joq jáne bolǵan emes», - dedi Nur-Sultan qalasynyń sáýlet, qala qurylysy jáne jer qatynastary basqarmasynyń basshysy Nurlan Uranhaev elorda ákimdiginde ótken baspasóz máslıhatynda.
Jıynda tabıǵat janashyrlary spıkerge «eger Taldykól boıyna qurylys salynsa, oǵan janýarlar men qustar orala ma?» degen saýal qoıdy.
«Kól men onyń mańy abattandyrylyp, ózi saqtalady. Sonymen qatar qoryq zonasy men saıabaq salynady. Bul janýarlar men qustarǵa kedergi bolmaıdy dep oılaımyn. Kerisinshe olardyń tirshiligi men kóbeıýine jaǵdaı jasalady. Bizde ony mekendeıtin ań-qustardyń tirshiligine kedergi keltirý maqsaty joq», - dedi qalalyq qorshaǵan ortany qorǵaý jáne tabıǵatty paıdalaný basqarmasynyń basshysy Álııa Qojabaeva.
Buǵan deıin habarlaǵanymyzdaı, Kishi Taldykóldiń bolashaǵyna qatysty elorda ákimdigi túsinikteme berdi.
Ákimdik ókilderiniń málimetinshe, kól mańaıyna turǵyn úıler men basqa áleýmettik nysandar salynbaq.
Sondaı-aq, atalǵan kóldiń florasy men faýnasyna qatysty sóz qozǵaldy.
