Taldykóldiń sýy tazartylyp Esilge quıylady (FOTO)
ASTANA. QazAqparat - Jyl sońyna deıin Taldykól laıdan tazartylmaq. Bul týraly Kommýnaldyq sharýashylyq basqarmasy basshysynyń orynbasary Tımýr Ábıjanov ózenniń sý tazartý qurylystaryn aralaý barysynda málimdedi.
Elordanyń resmı saıtynyń habarlaýynsha, Taldykól aǵyn sý jınaǵyshyn tazartý jobasy 2011 jyldan bastap qolǵa alynǵan. Bıyl kóldi tazartý boıynsha birqatar jumystar júrgizildi: qosymsha qurylystar salynyp, qaıta jóndeldi, sý tazartýǵa arnalǵan blok qoldanysqa engizildi. Ótken jyly Taldykólge sý jiberilý toqtatylǵan bolatyn.
«Byltyr sý tazartýǵa arnalǵan qosymsha blok paıdalanýǵa berildi, bloktyń ózi sýdy talaptarǵa sáıkes sanıtarlyq jáne gıgıenalyq normalarǵa deıin tazartady, bul ony Esil ózenine quıýǵa múmkindik beredi. Bul avstrııalyq tehnologııa. Qazirgi kezde sý tazartatyn blok jumys istep tur. Táýligine 136 myń tekshe metrge jýyq taza sý shyǵarylady. Kúnine birneshe ret sýǵa monıtorıng júrgiziledi, bizdiń zerthanamyz bar», - dedi T. Ábıjanov.
Ótken jyly sý tazartý sharalary qabyldanǵan soń Taldykóldiń kólemi 43 mıllıon tekshe metrge deıin azaıdy, buǵan deıin bul kórsetkish shamamen 56 mln tekshe metr bolatyn. Bul nátıjege byltyr qosymsha sý tazartý blogyn iske qosqannan keıin qol jetkizildi. Qosymsha sý tazartý degenimiz - súzgileý, ıaǵnı sýdy tereń tazartý. Búginde elordanyń aǵyndy sýlary tazartýdyń tórt satysynan ótedi: mehanıkalyq, bıologııalyq, qosymsha tazartý jáne ýltrakúlgin zalalsyzdandyrý. Osydan keıin taza, móldir jáne zalalsyzdandyrylǵan sý Esilge quıylady.
«Bıyl sý kólemin azaıtyp, sý túbindegi laı tazartylmaq. Negizinen, ıis sol laıdan shyǵady. Anaerobty protsester júrip, kúkirtti sýtegi bólinip shyǵady, ol atmosferaǵa taraıdy. Jyl sońyna deıin laı túgeldeı tazartylady, sonda jaǵymsyz ıis te ketedi. Búgingi tańda tıisti jumystardyń 37% oryndaldy. Laıdyń esh zııany joq, keıinnen ol kádege jaratylatyn bolady», - dedi Astana qalasynyń Kommýnaldyq sharýashylyq basqarmasy basshysynyń orynbasary T. Ábıjanov.
Bıyl kól túbin tazartý jáne sý deńgeıin azaıtý boıynsha barlyq jumystardy aıaqtaý kózdelgen. Qazirgi kezde Taldykóldegi sý kólemi 43 mln tekshe metrdi quraıdy, al jyl sońyna deıin bul kórsetkish aýdany 635 gektar bolatyn 9 mln-ǵa jetkizilmek. Aldaǵy ýaqytta Taldykól sýyn tazartý jumystary aıaqtalǵan soń kóldiń aınalasyndaǵy aýmaq demalys alabyna aınaldyrylady.
