Taldykólde qandaı flora men faýna túrleri bar
NUR-SULTAN. QazAqparat – Elorda irgesindegi Taldykól kólinde tirshilik etetin qustar men ósimdikter týraly Nur-Sultan qalasy sáýlet, qala qurylysy jáne jer qatynastary basqarmasynyń basshysy Nurlan Uranhaev aıtyp berdi, dep habarlaıdy QazAqparat tilshisi.
«Kóldiń batpaqty emes taza jeri sol kúıinde saqtalyp qalady. Jáne joba qalanyń bas josparyna saı iske asyrylady. Taǵy bir jaıt, bıosfera birlestiginiń ǵylymı-óndiristik jumysyna sáıkes Kishi Taldykól sýly-batpaqty alqap, las dep tanylǵan. Kóldi saqtap qalý úshin tazartý jáne basqa da jumystar júrgizilýi tıis. Óıtkeni kóldiń sýy ǵana emes, ondaǵy jerasty sýy da lastanǵan. Biz tazartý jumysy arqyly kóldiń ózin ǵana emes, ondaǵy flora men faýnany da saqtap qalǵymyz keledi. Búginde Taldykólde Qyzyl kitapqa engen 200 shamasynda qus jáne 90 ósimdik túri bar», - dedi Nurlan Uranhaev elorda ákimdiginde ótken baspasóz máslıhatynda.
Basqarma basshysynyń málimdeýinshe, Kishi Taldykóldiń sýly-batpaǵy - zerttelip, dáleldengen dúnıe. Jáne kóldi tazartýdaǵy maqsat – ekologııalyq apattyń aldyn alý.
Buǵan deıin habarlaǵanymyzdaı, Kishi Taldykóldiń bolashaǵyna qatysty elorda ákimdigi túsinikteme berdi.
Ákimdik ókilderiniń málimetinshe, kól mańaıyna turǵyn úıler men basqa da áleýmettik nysandar salynbaq.
