Taldykólde qalalyq tabıǵı saıabaq ashylýy múmkin
ASTANA. QazAqparat - Úlken jáne Kishi Taldykól aýmaǵynda qalalyq tabıǵı saıabaq ashylýy múmkin. Bul joba bekitilse, Taldykól tabıǵatty baǵalaıtyn jáne Qyzyl kitapqa engen qustardy tamashalaýdy unatatyndar úshin taptyrmas orynǵa aınalmaq, dep habarlaıdy Elorda ınfo.
Eske salaıyq, buryn Taldykólge aqpasýlar jınalatyn edi. Munda barlyq tazartý qurylystarynyń aǵyndary baǵyttalatyn.
«Bul joba tolyqtaı aıaqtalyp, sýlary tazartyldy. Endi bul qarapaıym kólge aınaldy. Biz Taldykólde qalalyq tabıǵı saıabaq jasaǵamyz keledi. Álemdik tájirıbede mundaı mysaldar bar - - London, Býenos-Aıres, Taıland. Tabıǵı saıabaqtarda balalarǵa arnalǵan, bıologııamen aınalysatyn jas tabıǵat zertteýshileri úshin bilim ortalyqtary salynady. Ózderińiz biletindeı, Taldykólde Qyzyl kitapqa engen qustardyń tórt túri mekendeıdi. Olar osynda qalyp kóbeıip, kúzde ushyp ketedi. Osyǵan baılanysty, Taldykóldiń janýarlar álemin zertteý sheteldik týrısterge de, stýdentterge de qyzyqty bolady dep oılaımyn», - dedi Astana qalalyq qorshaǵan ortany qorǵaý jáne tabıǵatty paıdalaný basqarmasy basshysynyń orynbasary m.a. Ábdimanap Jumadildaev.
Joba avtorlary Taldykól aýmaǵynda qalalyq tabıǵı saıabaqty 2018-2020 jyldarǵa arnalǵan Astana qalasynyń qorshaǵan ortasyn qalpyna keltirý keshendi jospary aıasynda ashpaqshy.
