Taldykólde demalys aımaǵy salynady
NUR-SULTAN. QazAqparat - Elordanyń Taldykól kóli aýmaǵynda demalys aımaǵy salynady. Bul týraly Nur-Sultan qalasy Esil aýdanynyń ákimi Berik Jákenov aıtty, dep habarlaıdy QazAqparat tilshisi.
«Taldykólge qatysty ınvestıtsııalyq baǵdarlama bar. Ony abattandyryp, demalys aımaǵyn jasaımyz. Ol óte tartymdy jerge aınalady. Bul ınvestıtsııalyq turǵyda tartymdy joba bolǵandyqtan ınvestorlarmen birge barlyǵyn tyńǵylyqty qarastyrý qajet. Tolyqtaı alǵanda atalǵan aýdandy damytýǵa qatysty naqty paıymymyz bar», - dedi aýdan ákimi Facebook-tegi Astananyń adaldyq alańy paraqshasynda ótken onlaın brıfıng barysynda.
Eske salaıyq, Taldykól 1970 jyldan beri sarqyndy sýlardy jınaqtaǵysh bolyp tabylady. Udaıy aǵyp turatyn sarqyndy sýlar onyń tabıǵı jaǵasyn shaıyp ketken. 1969 jyly kóldiń aınalasyna jasandy bóget salynyp, ol Tselınograd qalasynyń kárizdik tazartý qurylystarynyń bir bóligine aınaldy. Búginde Taldykól áli de Astana qalasynyń tazartylǵan sarqyndy sýlaryn akkýmýlıatsııalaýǵa arnalǵan syıymdylyq bolyp tabylady. Onyń kólemi 65,5 mıllıon tekshe metr sýdy quraıdy.
2017 jyly «Taldykól» sý jınaqtaǵyshyn joıýdy aıaqtap, tazalaý qurylǵysy tolyq iske qosyldy. Sý tazalanǵannan keıin «Nura-Esil» arnasy arqyly Esil ózenine quıylady.
