«Taldykól» tolyq joıyldy
ASTANA. QazAqparat - Elorda túbindegi «Taldykól» sý jınaqtaǵyshty joıý tolyq aıaqtaldy. Bul týraly búgin Astana qalalyq máslıhatynyń kezekti sessııasynda elorda ákiminiń orynbasary Qosman Aıtmuhametov aıtty, dep habarlaıdy QazAqparat.
«Biz «Taldykól» sý jınaqtaǵyshyn joıýdy aıaqtap, tazalaý qurylǵysyn tolyq iske qostyq. Sý tazalanǵannan keıin «Nura-Esil» arnasy arqyly Esil ózenine quıylýda. Telman aýylynda sorǵy stansa salyp, ındýstrıaldy parkke deıin qubyr tarttyq. Indýstrıaldy parkte sý qoımasynyń qurylysyn aıaqtadyq. Endigi ýaqytta JES-2 men JES-3-ke tehnıkalyq sýdy Esilden alamyz», - dedi ol.
Qosman Aıtmuhametovtiń aıtýynsha, Astananyń lastaný ındeksi 4,91 birlikti qurady. Bul lastanýdyń tómengi deńgeıimen saı keledi. Sondaı-aq sýdyń lastanýyn da 2,27 birlikke deıin tómendetildi.
Eske salaıyq, Taldykól 1970 jyldan beri sarqyndy sýlardy jınaqtaǵysh bolyp tabylady. Udaıy aǵyp turatyn sarqyndy sýlar onyń tabıǵı jaǵasyn shaıyp ketken. 1969 jyly kóldiń aınalasyna jasandy bóget salynyp, ol Tselınograd qalasynyń kárizdik tazartý qurylystarynyń bir bóligine aınaldy. Búginde Taldykól áli de Astana qalasynyń tazartylǵan sarqyndy sýlaryn akkýmýlıatsııalaýǵa arnalǵan syıymdylyq bolyp tabylady. Onyń kólemi 65,5 mıllıon tekshe metr sýdy quraıdy.
