Taldykól sý jınaqtaýshysyn joıý jobasy tazartý qurylǵylary ónimdiligin 2 esege arttyrady
ASTANA. QazAqparat - Astanada Taldykól sarqyndy sý jınaqtaýshysyn joıý jobasyn 2011-2016 jyldary júzege asyrý kózdelgen.
Jobanyń maqsaty - tazartylǵan sarqyndy sýlardy Esil ózenine jiberip, Taldykól sý jınaqtaýshysynyń aýmaǵyn azaıtý, sondaı-aq tazartý qurylǵylarynyń ónimdiligin táýligine 136 000 tekshe metrden 254 myń tekshe metrge deıin ulǵaıtý.
«Bekitilgen josparǵa sáıkes, birinshi kezekte joba iske qosý boıynsha 4 keshenge bólindi. Qazirgi kezde merdiger qosymsha qurylǵynyń qurylysy boıynsha qurylys-montaj jumystaryn aıaqtady»,-delingen Astana ákimi baspasóz qyzmetiniń málimetinde.
Sonymen qatar 2-shi iske qosý kesheni boıynsha jumystar da aıaqtaldy. Onyń aıasynda qoldanystaǵy sarqyndy sýdy tazartý júıesin jańǵyrtý, qubyrlardy montajdaý, nysandardaǵy tehnologııalyq jabdyqtardy aýystyrý sharalary qamtyldy.
3-shi iske qosý kesheni óziniń jumysyn 2014 jyldyń tamyzynda bastaıdy.
Bular atqarylǵannan keıin «Taldykól» sý jınaqtaýyshynyń kólemi 2 021 gektardan 612 gektarǵa deıin azaıady.
Eske salaıyq, Taldykól 1970 jyldan beri sarqyndy sýlardyń jınaqtaýshysy bolyp tabylady. Udaıy aǵyp turatyn sarqyndy sýlar onyń tabıǵı jaǵasyn shaıyp ketken. 1969 jyly kóldiń aınalasyna jasandy bóget salynyp, ol Tselınograd qalasynyń kárizdik tazartý qurylystarynyń bir bóligine aınaldy. Búginde Taldykól áli de Astana qalasynyń tazartylǵan sarqyndy sýlaryn akkýmýlıatsııalaýǵa arnalǵan syıymdylyq bolyp tabylady. Onyń kólemi 65,5 mıllıon tekshe metr sýdy quraıdy.
