Taldykól sarqyndy sý jınaqtaýshysyn joıý jobasy 2016 jylǵa qaraı aıaqtalady - Astana
ASTANA. QazAqparat - Elordada Taldykól sarqyndy sý jınaqtaýshysyn joıý jobasy 2016 jyldyń sońynda aıaqtalady. Bul týraly búgin Astana qalasynyń máslıhatynyń kezekten tys XXIX sessııasynda belgili boldy, dep habarlaıdy astana.kz.
«Taldykól sarqyndy sý jınaqtaýshysyn joıý jobasyn tapsyrý merzimi 2017 jyl dep belgilengen bolatyn. Qazirgi ýaqytta júrgizilgen jumystar kesteden alǵa ketti. Sondyqtan jobany tapsyrý merzimi 2016 jyldyń sońy», - dedi qalalyq Kommýnaldyq sharýashylyq basqarmasynyń basshysy Pavel Kýlagın óz kózinde.
Aıta keteıik, bul asa iri joba, ony 2011-2016 jyldary júzege asyrý kózdelgen.
«Jobanyń maqsaty - tazartylǵan sarqyndy sýlardy Esil ózenine jiberip, Taldykól sý jınaqtaýshysynyń aýdanyn 2 myńnan 600 gektarǵa deıin azaıtý, sondaı-aq, tazartý qurylǵylarynyń ónimdiligin táýligine 136-dan 254 myń tekshe metrge deıin ulǵaıtý bolyp tabylady», - dedi P.Kýlagın.
Sonymen qatar, Basqarma basshysy oryndalǵan jumystardyń aralyq qorytyndysyn shyǵardy.
«Bekitilgen josparǵa sáıkes birinshi kezekte joba budan ári qabyldaý men protsedýralardy jeńildetý úshin 4 keshenge bólindi. Sondyqtan memlekettik komıssııa 1 jáne 2 keshenderge ótken jyly qol qoıdy. Olar boıynsha BÓP salynyp, materıaldar men qondyrǵylardy qamtamasyz etip, bıologııalyq tazalaýdy qalpyna keltirý jumystary júrgizildi. Ýltrakúlgin zararsyzdandyrý tsehynda shamdar aýystyryldy, júk tehnıkasyna arnalǵan jóndeý-turaq boksy salyndy, sondaı-aq, sýdy sorǵy stansasynyń Esil ózenine quıý ornyna deıin jıyntyq kollektor tóseldi, quıý orny men jaǵany kúsheıtý boıynsha jumystar júrgizildi», - dedi P. Kýlagın.
Eske salaıyq, Taldykól 1970 jyldan beri sarqyndy sýlardyń jınaqtaýshysy bolyp tabylady. Udaıy aǵyp turatyn sarqyndy sýlar onyń tabıǵı jaǵasyn shaıyp ketken. 1969 jyly kóldiń aınalasyna jasandy bóget salynyp, ol Tselınograd qalasynyń kárizdik tazartý qurylystarynyń bir bóligine aınaldy. Búginde Taldykól áli de Astana qalasynyń tazartylǵan sarqyndy sýlaryn akkýmýlıatsııalaýǵa arnalǵan syıymdylyq bolyp tabylady. Onyń kólemi 65,5 mıllıon tekshe metr sýdy quraıdy.
