Taldykól boıynda ekoparkter bolady - Astananyń Bas jospary talqylandy

ASTANA. QazAqparat – Astanada qoǵamdyq keńistikter men abattandyrylǵan aýmaqtar (saıabaqtar, gúlzarlar men jelekjoldar) kóptep paıda bolady. 2035 jylǵa deıingi qalanyń Bas josparynyń jobasy turǵyndardyń qatysýymen «Astana bas jospary» ǵylymı-zertteý jobalaý ınstıtýtynda talqylandy, dep habarlaıdy QazAqparat elorda ákimdigine silteme jasap.

Máselen, 2023 jyly Úrker (Ilınka), Telman eldi mekenderinde, Sh.Aıtmatov kóshesi aýmaǵynda, J.Táshenov pen T.Hýseın kósheleriniń qıylysynda, Abaı dańǵylynda gúlzarlardy abattandyrý josparlanyp otyr.

Sol sııaqty Abylaıhan dańǵylynyń boıynda, Kúıshi Dına kóshesinen Mustafın kóshesine deıingi aralyqta, Júrgenov kóshesi, 28/1, Qoshqarbaev kóshesi, 45, Qordaı jáne Taıqazan kósheleriniń qıylysynda, K.Ázirbaev kóshesi, 10-14 jáne taǵy basqa mekenjaılarda alleıa ashylady. Málim etilgendeı, sońǵy jyldary Astanada jyl saıyn 200-den astam aýla men qoǵamdyq keńistik (saıabaqtar, gúlzarlar, jelekjoldar) abattandyryldy.

Sonymen qatar Úlken jáne Kishi Taldykól boıynda ekoparkter salynady. Ekopark jobasy aýmaqty abattandyrýdy, Úlken jáne Kishi Taldykól sý balansyn saqtap ári tolyqtyra otyryp, rekreatsııalyq aımaq salýdy kózdeıdi. Sý aıdyndary salynady, olar sýmen qamtamasyz etiledi. Bul sýdyń tepe-teńdigin saqtaýǵa jáne sýdyń tabıǵı túrde súzilýin jasaýǵa, ekojúıeniń bıoártúrliligin saqtaýǵa múmkindik beredi. Buǵan deıin Kishi Taldykól aýdanynda saıabaqtyń relefin qurý jáne aǵash otyrǵyzý úshin aýmaqty daıyndaý jumysy bastalǵan bolatyn. Sol sııaqty Úlken Taldykól mańynda qoryq jáne orman-saıabaq aımaǵy bar eldegi alǵashqy tabıǵı park ashylady.

Keıingi jyldardyń ózinde Astanada 900-den astam aýla men qoǵamdyq keńistik abattandyryldy.

«Astananyń Bas josparynyń jobasy talqylaý kezeńinde tur. Bas jospar jobasyn talqylaý 2022 jylǵy 15-18 qarasha aralyǵynda «Astana bas jospary» ǴZJI» JShS ǵımaratynda, Astana qalasy, Á.Mámbetov kóshesi, 22 mekenjaıynda ótedi», - delingen habarlamada.