Taldyqorǵannyń qaq ortasynda er adamdy tanysy pyshaqtap óltirdi
TALDYQORǴAN. KAZINFORM — Taldyqorǵanda tanys adamdar arasynda bolǵan janjaldan keıin bir adam qaza tapty.
Oqıǵa jaıly aqparat áýeli áleýmettik jelilerde taraǵan.
Ondaǵy málimetterge qaraǵanda, adam qarasy qalyń jerde jastar arasynda janjal shyǵyp, olardyń biri ekinshisin pyshaqtap ketken.
Jetisý oblystyq polıtsııa departamentiniń habarlaýynsha, osy oqıǵaǵa baılanysty qylmystyq is qozǵaldy.
— Aldyn ala málimet boıynsha, 30 naýryz kúni keshke tanys adamdar arasynda janjal shyǵyp, arty tóbeleske ulasqan. Sol kezde jábirlenýshi pyshaq jaraqatyn alyp, sol jaraqattan kóz jumdy, — dep habarlady polıtsııa departamentiniń baspasóz qyzmeti.
Oqıǵadan keıin kúdikti qashyp ketken. Alaıda jedel izdestirý sharalary barysynda ol kóp uzamaı ustaldy.
Qazir sotqa deıingi tergeý júrgizilip, oqıǵanyń mán-jaıy anyqtalyp jatyr.
Eske salaıyq, buǵan deıin Almaty oblysynda bir top adam arasynda janjal bolyp, arty tóbeleske ulasqanyn jazǵanbyz.
Oqıǵa kezinde polıtsııa qyzmetkerleri eskertý retinde aspanǵa qarata oq atqan.
