Taldyqorǵannyń bıýdjeti 33% ulǵaıtylyp, qalany damytýdyń basym baǵyttary belgilendi
TALDYQORǴAN. KAZINFORM - Taldyqorǵandy aldaǵy jyldarda qaýipsiz, jaıly, jasyl qala retinde damytý mindeti qoıylǵan. Ony iske asyrý úshin 2025-2026 jyldardyń naqty josparlary jasalyp, qala bıýdjeti 33 paıyzǵa ulǵaıtyldy.
Bul týraly oblys ákimi Beıbit Isabaevtyń jýrnalısterge bergen suhbaty barysynda aıtyldy, - dep habarlaıdy Jetisý oblysy ákiminiń baspasóz qyzmeti.
Óńir basshysy óz sózinde oblys ortalyǵyn damytýdyń basym baǵyttaryna toqtaldy. Bul rette qala turǵyndarynyń qaýipsizdigin qamtamasyz etý isi aldyńǵy orynda tur. Osy maqsatta qoǵamdyq tártipti qadaǵalaıtyn 585 beınekamera jáne jol qaýipsizdigin qamtamasyz etetin 136 «Sergek» kamerasyn ornatý mejelengen.
«Smart Sıtı» formaty boıynsha qalanyń tirshiligin táýlik boıy baqylaı alatyn sıtýatsııalyq ortalyqty iske qosý josparda bar. Oǵan qosa kóshelerdi jaryqtandyrý da qolǵa alynady. Búgingi kúni qaladaǵy 640 kósheniń 420-synda ǵana, ıaǵnı, 65 paıyzyna jaryq ornatylǵan. Osyǵan oraı jergilikti bıýdjetten bıyl kóshelerdi jaryqtandyrýǵa 3,5 mlrd teńge bólinip otyr. Sonyń arqasynda birqatar saıajaıda jáne «Hýtor», «Shyǵys» jáne basqa da aýdandarda kósheler jaryqtandyrylady.
Sonymen qatar qalanyń ómir súrýge jaıly bolýyna da nazar aýdarylady. ıAǵnı halyq baspanamen, jylýmen, elektrmen, sýmen, gazben qamtamasyz etilýi kerek. Máselen, ótken jyly Taldyqorǵanda 1283 otbasyǵa baspana berilse, bıyl turǵyn úıge ıe bolatyndardyń sany 1500-ge jýyqtaıdy dep josparlanyp otyr.
Shahardyń kórki abattandyrýǵa tikeleı baılanysty. Sondyqtan aýlalarǵa vorkaýt alańdaryn salý, kóp qabatty úılerdiń shatyrlary men qasbetterin jańartý, aryqtar men arnalardy qalpyna keltirý jalǵasady. Byltyr 28 kópqabatty úıdiń shatyryna jóndeý jumystary júrgizilgen. Kóppáterli 10 úıdiń qasbeti jasaldy. Bıyl taǵy 30 kópqabatty úıdiń shatyry men 32 úıdiń qasbeti jóndeledi.
- Qaladaǵy «Ulan» yqshamaýdanyna otyz jyldan astam ýaqyt jóndeý júrgizilmegen. Aýdandy abattandyrý máselesin uzaq talqylap, saraptama jasap baryp, sheshim qabyldadyq. Sol arqyly tájirıbe qalyptasty. Endi keshendi túrde jumys isteımiz. Byltyr aldymen 25 kóp páterli úıdiń 5 aýlasyn jóndedik, qalǵan aýlalardy bıyl bitiremiz. Sondaı-aq «Ulan» yqshamaýdanyndaǵy jóndeýdi qajet etetin kóp qabatty úılerdiń shatyryn jóndeımiz. Sodan soń «Jetisý» jáne «Juldyz» yqshamaýdandaryna aýysyp, keshendi tártippen kógaldandyrý jumystary júrgiziledi. ıAǵnı, aldymen qalanyń nazardan tys qalǵan shetki aýdandaryn qamtımyz, - dedi B. Isabaev.
Kógaldandyrý jaıyna kelsek, Taldyqorǵanda ótken jyly 10 myńdaı aǵash otyrǵyzylsa, bıyl 12 myńnan astam kóshet egý kózdelgen. Qalanyń «Qulager» shaǵynaýdanynda aýmaǵy 1,2 gektar bolatyn jańa saıabaq salý josparda bar. Al «Birlik» aýdanynda jańa skver paıda bolady. Sol sııaqty aǵashtar men kógaldardy sýarý júıesin retteý qolǵa alynǵan. Búginge deıin shamamen 10 shaqyrymdaı aryq júıesine jóndeý júrgizildi, bul jumys bıyl da jalǵasady. Oǵan qosa Ortalyq jáne «Jastar» saıabaqtaryna aǵymdaǵy jóndeý jasalady.
