Taldyqorǵandyq kásipkerler saýda úıleri mańyn abattandyrýǵa nege qarsy
TALDYQORǴAN. KAZINFORM - Taldyqorǵan qalasynda bir top kásipker saýda úıleri ornalasqan kóshege qurylys jumystaryn júrgizýge qarsylyq bildirdi. Ákimdiktegiler jobanyń mańyzdy ekenin jáne usynystar qabyldanatynyn aıtyp otyr.
Qala ortalyǵyndaǵy Birjan sal kóshesi men Gaýhar ana kóshesiniń qıylysynan tómen qaraı irili-usaqty 20-dan astam saýda úıi bar. Azyq-túlikten bastap turmystyq, qurylys zattar men jıhazǵa deıin satylatyn sol nysandardyń aldyna qalalyq ákimdik kóktemde abattandyrý jumystaryn júrgizbek. Al saýdamen tabys taýyp otyrǵan jandar munymen kelispeıdi. Aıtýlarynsha, jańa qurylys júrse, tutynýshylar bolmaı, kásipteri toqtap qalady.
- Bizge eshqandaı arbat salyp, kóshemizdi jóndeýdiń qajeti joq. Qanshama jyl buryn qurylys júrdi. Sodan beri kóshemiz de, jaıaý júreginshiler júretin jolymyz da jaqsy. Qurmanov pen Gaýhar anaǵa deıin ár saýda úıiniń jumysshylary ózine tıesili jerdi tazalap ketedi. Endi qurylys júrse barlyq saýda úıi ýaqytsha bolsa da jabylady. Bizdiń tóleıtin salyǵymyz bar, kúndelikti saýdamyz, satýshylarymyzdyń aqshasy bar ony biz qaıdan shyǵaryp beremiz? Bizdiń talabymyz kóshemizge tıispesin, - dedi kásipker Saltanat Janjigitova.
Bazar mańy bolǵan soń munda kólik turaǵy da úlken másele. Tar kóshege taýar artqan júk kólikteriniń de kirip-shyǵýy qıyn. Kásipkerler joba boıynsha abattandyrý jumystary júrgizilse, jol tarylyp, kelýshilerdiń júrip-turýyna kedergi bolatynyn onda saýda-sattyqtarynyń toqtaıtynyn aıtady.
- Bul qurylys - saýda úıiniń ıesine de, ony jalǵa alyp otyrǵandarǵa da qıyndyq týǵyzaıyn dep tur. Ekinshiden saýda jasaıtyn adamdardyń kelýine de kedergi jasaıdy. Osynshama aqsha shyǵaryp saýda úılerin nege saldyq? Elder munda erikkennen júrgen joq. Basynda aıtylýy kerek edi. Osynda 50-60 saýda úıi bar, - dedi kásipker Gúlnar Kerimbekova.
Kóshege shyǵyp máselelerin kótergen kásipkerlerdiń shaǵymyn qalalyq ákimdik ókilderi kelip tyńdap, jobany tanystyrdy.
- Negizi bul kisiler durys túsiný kerek biz eshqandaı zııan keltirip jatqan joqpyz. Abattandyrý jumystary jasalady, ár saýda úıiniń aldynda kólik turaqtary bolady. ıAǵnı avtokólik, aýyr júk kóligi bolsyn kire alatyndaı, tura alatyndaı múmkinshilik bolady. Bul jabyq arbat emes. Qazirgi tańda joba saraptamanyń oń qortyndysyn aldy. Oǵan deıin ákimshilik tarapynan qoǵamdyq tyńdaýlar ótkizdik. Joba quny shamamen 1,5 mlrd teńge. Qazir qurylysqa 500 mln bólindi. Qurylys jumystary boljam boıynsha bıyl sáýir aıynan bastalady. Bizdiń mamandar baryp qaıtty. Saýdagerler ózderiniń usynystaryn bizge jazbasha túrde berse bolady. Qurylys bastalǵanda jobaǵa ózgerister engizýdi qarastyramyz, - dedi Taldyqorǵan qalasy TÚKSh bóliminiń basshysy Almas Barlybekov.
Aıta keteıik, joba iske assa Birjan Sal kóshesi boıyna jaıaý júrginshiler joly, jaryq shamdary, oryndyqtar, kógaldandyrý, aryq jelisi, avtomatty sýǵarý júıesi, kólik turaqtary jáne qoqys oryndary jasalady. Eske salaıyq osyǵan deıin Taldyqorǵanda «Aıgólek» balabaqshasynda bolǵan jaǵdaıǵa qatysty tekserý bastalǵanyn jazǵanbyz.